«Ժողովուրդ, ամոթ է սրանցից վախենալը». Վահե Հակոբյանը կոչ է անում չվախենալ, թեկուզ 12 օրով էլ աշխատանքը կորցնել՝ իրենք կփոխհատուցեն (տեսանյութ)

Երկու օր է՝ այս իշխանության ներկայացուցիչները՝ մարզային և դրսից, զանգում ու ահաբեկում են մարդկանց, որ իրենք չգան մեզ հետ հանդիպման: Մենք ստանում ենք զանգեր, որ՝ կներեք, չենք ուզում գանք: Այսինքն վախի մթնոլորտը փորձում են տարածել ամենուր: Այդ մասին Սյունիքի մարզի Սիսիան քաղաքում «Հայաստան» դաշինքի քարոզարշավի ժամանակ ասաց «Վերածնվող Հայաստան» կուսակցության ղեկավար Վահե Հակոբյանը: 

«Մենք փայլուն հանդիպումներ ունեցանք Ագարակում, Մեղրիում, Քաջարանում, Կապանում և Գորիսում»,- ամփոփելով մարզային քարոզարշավը՝ ասաց Հակոբյանը:

«Ժողովուրդ, ամոթ է սրանցից վախենալը, պարզապես ամոթ է, 4 անգամ ամոթ ա, որ գնան իրանց ձայն տան: Այսօր ամենախիզախները գալիս կանգնում են մեր կողքին: Չեմ ընդունում, որ ասում են՝ մենք չենք կարողանալու գանք, որովհետև մեզ կարող է աշխատանքից ազատեն: 12 օր էլ առանց աշխատանք մնացեք, մենք ամբողջը կփոխհատուցենք: 3 տարի է՝ գոռում են կոռուպցիա, մեկ դեպք կարո՞ղ եք ասել, որ ինչ-որ մեկն ուժի մեջ մտած դատավճռով դատապարտվել է կոռուպցիայի ելևէջներով: Ո՛չ: Որովհետև այդպիսի նախադեպ չկա: 

Նա ընդգծեց, որ իրենք՝ «Հայաստան» դաշինքը, եկել են, որպեսզի փրկեն մեր պետականութունը, մեր պետությունը, և որ այլ տարբերակ չունեն: 

Հակոբյանը պատմեց, որ Մեղրիում իրեն ծանոթ մի տարեց մարդ իրեն հարցրել է՝ «Հակոբյան ջան, բայց էս աթոռ կռիվ չի, չէ՞»: 

«Գիտե՞ք՝ պատասխանը որն է և դա փաստ է: Մեր բոլորի աթոռները՝ այստեղ նստած և մնացած թիմակիցների, շատ ավելի հարմարավետ են, քան այսօր իշխանության առոթը և եթե մենք այս ճանապարհի վրա կանգնել ենք, ուրեմն ունենք ապացուցելու բան»,- շեշտեց «Հայաստան» դաշինքի ներկայացուցիչը: