Ո՞ւմ վրա է «մուննաթ» գալիս Ալեն Սիմոնյանը

Նիկոլ Փաշինյանի անձնական օգտագործման գործիք Ալեն Սիմոնյանը՝ որպես փորձառու պնդերես, որին ամեն պատեհ-առիթով նետում են «առաջնագիծ»՝ փրկելու յուր շեֆի դեմքը, երեկ էլ հոխորտացել է, թե 2000-2002 թվականներին, բանակում ուտելիքի ու ջրի խնդիր կար, զինվորներին տանում էին քաղաք, որ լողանան։

Նախ այստեղ հպանցիկ նշենք, որ այսօր էլ՝ 21-րդ դարում, մասնավորապես Արցախի որոշ զորամասերում առնվազն լողանալու խնդիր կա: Բայց, հայրենիք հանձնած իշխանության ո՞ր ներկայացուցիչն է համարձակվում այցելել Արցախից մնացած հատված՝ տեղում ծանոթանալու արցախահայության ու զինվորների խնդիրներին: Իրենց ուղիղ շեֆ Ալիևը թույլ չի տալիս: 

Ինչևէ: 

Թեման բողոք հայտնած Ալեն Սիմոնյանն է, ով, ըստ իր կենսագրության, ծառայել է 2000-2002 թվականներին: Բանն այն է, որ 2000-2008 թվականներին Հայաստանի Հանրապետության պաշտպանության նախարարի թիկունքի գծով տեղակալ - զինված ուժերի թիկունքի պետը, ով ի պաշտոնե պարտավոր էր ապահովել զինվորի հացուջուրը, Գուրգեն (Գագիկ) Մելքոնյանն էր: Եվ այստեղ ծիծաղելին այն է, որ այն մարդը, ով պատասխանատու է եղել Սիմոնյան Ալեն զինծառայողի և մյուսների հացուջրի համար, և ով, ըստ Սիմոնյանի, զինվորին սոված է պահել, այսօր ընդգրկված է, ուշադրություն, «Քաղաքացիական պայմանագիր» կուսակցության ցուցակի 16-րդ տեղում, որը, ամենայն հավանականությամբ, անցողիկ է լինելու: 

Երբեմնի «ժողովրդի կողքին կանգնող» և ՕՐՕ դաշինքում բախտը փորձած ու անհաջողության մատնված Մելքոնյանն այսօր ճամբարափոխ է եղել՝ լքել է ժողովրդին ու տաք տեղ է գտել: Լքել է ժողովրդին, որն ամուր կանգնած է ընդդեմ հողատու, եթե կուզեք՝ հողավաճառ իշխանության: Ժողովրդին, որը չի ցանկանում թուրքի հետ քիրվայություն անել: Ժողովրդին, որի ոսկե սերունդն իր նորընծա շեֆը՝ Փաշինյան Նիկոլը տարել է մսաղաց ու կոտորել: Ժողովրդին, որը գլխապատառ իր գերիներին է փնտրում, դիակներից մասունքներ է փնտրում ու չի գտնում: Ժողովրդին, որն անտուն-անօթևան է դարձել:

Փոխարենը Մելքոնյան Գուրգենն ընտրել է ժողովրդի թշնամուն ու գալիք աթոռը՝ թքելով նույն ժողովրդի վրա: 

Ինչ վերաբերում է Ալեն Սիմոնյանին, ապա նա միշտ է ճանկռում իրեն նետված «կոնֆետը»՝ կլինի դա փողի, պաշտոնի, թե հենց կոնֆետի տեսքով: 

Իսկ նա իր «մուննաթի» սլաքներն արդեն պարզ է, թե ում ուղղությամբ պետք է պարզի, բայց կարո՞ղ է, իրենց սիրած բառով ասած, «տղամարդլամիշ» լինել այնպես ու այնքան, որ Գուրգեն Մելքոնյանից պատասխան պահանջի: 

Հազիվ թե...

NEWSPRESS.am