Ջերմոցատերերը արտահանման համար բերք չունեն

Եթե 2011 թվականին հանրապետության տարածքում շահագործվող ջերմատների ընդհանուր տարածքը կազմում էր շուրջ 500 հեկտար, ապա 2015 թվականի մայիսի 20-ի դրությամբ ջերմատների ընդհանուր տարածքը կազմում է 763.62 հեկտար: Նշենք, որ վերջերս ՀՀ գյուղատնտեսության նախարար Սերգո Կարապետյանը խոսել է գյուղմթերքի արտահանման խթանմանն ուղղված աշխատանքներից, մասնավորապես, նշել է, որ կարող ենք արտահանել թարմ և վերամշակված պտուղ-բանջարեղեն: Արդյոք ջերմոցատերերը, որոնց տարածքներն ավելացել են կարո՞ղ են մաս կազմել արտահանմանը և ի՞նչ ունեն առաջարկելու հատկապես ռուսական շուկային: newspress.am-ը զրուցեց Հայաստանի ջերմոցային տնտեսությունների ասոցիացիայի նախագահ Պողոս Գևորգյանի հետ:

«Ի՞նչ ունենք, որ ինչ առաջարկենք, հիմա ջերմոցատերերը բերք չունեն, ի՞նչ արտահանման մասին է խոսքը: Այո, խոշոր ջերմոցատերերը կարող են արտահանել, հիմա էլ արտահանում են լոլիկ, վարունգ, սակայն փոքր ու միջին ջերմոցատերերին դա չի վերաբերում. հիմա մենք այնպիսի բանջարեղեն ենք մշակում, որ գարնանը բերք տա, ծախսը քիչ լինի»,- ասաց Պ. Գևորգյանը:

Ըստ նրա, այս շրջանում հայկական ջերմոցային տնտեսությունները կոլապսի մեջ են, վիճակը ծանր է, անգամ չեն կարողանում նորմալ ջերմաստիճան ապահովել ջերմոցներում. ջերմոցատերերը վարկեր ունեն, ռեսուրսներ ու բերք չունեն:

Ինչ վերաբերում է այն փաստին, որ ռուսական շուկան բաց է և հայ արտադրողները կարող են միրգ և բանջարեղեն արտահանել, նշեց, որ անգամ խնձորի արտահանում չենք կարողացել կազմակերպել. «Իրանը էժան խնձոր է արտահանում ՌԴ, իսկ թուրքական բանջարեղենի տեղը զբաղեցնում է եգիպտական, նաև իրանական բանջարեղենը: Եթե փոքր ու միջին ջերմոցատերերի համար փոփոխություն չլինի` ցածր տոկոսադրույքով վարկեր, նորագույն տեխնոլոգիաների ներդրում, ապա ջեմոցատերերը կսննկանան»: