Սահմանին լարված է ու մենք պետք է կարողանանք պահպանել մեր երկրի անվտանգությունը. Գագիկ Ծառուկյան (լուսանկարներ)

Մեր երկրի անվտանգությունը տեսնում ենք միայն Ռուսաստանի հետ համագործակցությամբ, որը մեր հիմնական դաշնակից գործընկերն է։ Այս մասին Նոր Հաճնում հայտարարեց ԲՀԿ ղեկավար Գագիկ Ծառուկյանը, ով համայնք էր այցելել նախընտրական քարոզարշավի շրջանակում։

Հիշեցնենք, որ ԲՀԿ ղեկավարն իր նախընտրական քարոզարշավը սկսեց Աբովյանից։ Նա իր խոսքում նկատեց, որ չլուծվող խնդիրներ չկան, միայն թե գործին լավ կպչել է պետք։ Գագիկ Ծառուկյանը հիշեցրեց նաև իր տված խոստումների մասին, որոնք խոսքից գործի են վերածվել։

Մասնավորապես հիշեցրեց իր բնակարանաշինության ծրագիրը, որը կյանքի է կոչվել 3 ամսվա ընթացքում։

Ինչ վերաբերվում է երկրի անվտանգությանը, ապա նա նկատեց, որ դեռ պատերազմից առաջ զգուշացնում էր, որ Արցախում սահմանները վտանգված են և պետք է կառավարությունը 100%-ով հրաժարական տա, սակայն իրեն լուրջ չընդունեցին։

«Ժողովուրդ ջան, մեղավորը դուք եք` մի նայեք Ծառուկյանն է, ձեր բարեկամն է, ծանոթն է. Դուք պետք է հասկանաք, թե ով կարող է ձեզ այս վիճակից հանել»,- ասաց Ծառուկյանը։

Խոսելով ԲՀԿ ծրագրերի մասին` Գագիկ Ծառուկյանը նշեց, որ այսօր արդեն ժողովրդի ընտրությունից է կախված, թե ով կզբաղվի երկրի անվտանգության հարցերով։

«Մեր կուսակցությունն ի վիճակի է լուծել երկրի առաջ ծառացած բոլոր խնդիրները։ Մենք հավատացյալ ազգ ենք, դա մեր հպարտությունն է, մենք հպարտ ենք, որ հայ ենք, դա մենք պետք է պահենք, պահպանենք»,-ասաց Ծառուկյանը և հավելեց, որ սահմանին լարված է ու մենք պետք է կարողանանք պահպանել մեր երկրի անվտանգությունը.

« Աստված պահապան մեր ժողովրդին»,- եզրափակեց Ծառուկյանը։