Խնդիրները արդեն հետևում են. «Նարվա» շախմատի դպրոցն անվճար խմբակներում ընդունելություն է հայտարարել

Այսօր` դեկտեմբերի 15-ից կմեկնարկի «Նարվա» շախմատի դպրոցի բաց առաջնությունը, որը կշարունակվի մինչև դեկտեմբերի 23-ը:

Առաջնությանը նախատեսվում է բոլոր շախմատիստների մասնակցությունն անկախ տարիքից և մարզական կարգից:

«Նարվա» շախմատի դպրոցի հիմնադիր – տնօրեն Նարեկ Վարազդատյանը newspress.am-ի հետ զրույցում հայտնեց, որ հաղթողները կպարգևատրվեն, իսկ համապատասխան միավորներ վաստակած մասնակիցներին կշնորհվեն մարզական կարգեր:

Հարցին, թե ինչ կարգավիճակում է այսօր շախմատի դպրոցը, քանի որ դեռ վերջերս դպրոցը որոշակի խնդիրներ ուներ և կանգնել էր փակման եզրին` Նարեկ Վարազդատյանը պատասխանեց, որ այսօր հիմնական խնդիրներն արդեն հետևում են, իսկ 2016թ-ին էլ նոր ներդրումներ են ակնկալվում: Հիմնադիր-տնօրենի փոխանցմամբ հնարավոր է նոր մասնաճյուղ բացվի նաև Վայոց Ձորում:

Բացի այդ «Նարվա» շախմատի դպրոցի անվճար խմբակում նոր ընդունելություն է նախատեսվում: Նարեկ Վարազդատյանը վստահեցնում է, որ ընդունելության համար հիմք են հանդիսացել մի շարք քաղաքացիների խնդրանք-դիմումները: Նկատենք, որ ընդնելություն նախատեսվում է նաև 4 տարեկան երեխաների համար:

«Դպրոցի անվճար խմբակում սովորելու համար մասնակիցների ընտրությունը անցկացվելու է բանավոր՝ հարցազրույցի տեսքով: Հատուկ նախապատվություն է տրվելու ազատամարտիկների, ծնողազուրկ, սոցիալապես անապահով և հաշմանդամության կարգ ունեցող երեխաներին»,- իր խոսքում նկատեց Նարեկ Վարազդատյանը:

Հարկ է նշել, որ ընդունելությանը մասնակցելու համար անհրաժեշտ է, որ ծնողը ներկայացնի նամակ, որը կընդգրկի մինչև 300 բառ: Այն պետք է հիմնավորի, թե ինչո՞ւ է երեխան ցանկանում սովորել շախմատ:

Հայտերն ընդունվում են մինչև 2016 թվականի հունվարի 13-ը: