Մենք մեր մեռելը աճուրդի չենք հանում, աղջիկ ջան, սաղ փողերը տալիս եմ սաղ քեզ, բեր իմ ախպորը տուր ինձ. անհետ կորածի հարազատը՝ Քրիստինե Հալաջյանին (տեսանյութ)

Անհետ կորած զինծառայողի հարազատ Արսեն Ղուկասյանը ֆեյսբուքյան իր էջի ուղիղ եթերում անդրադարձել է ԱՄՆ-ում բնակվող Քրիստինե Հալաջյանին, ով իրեն թույլ էր տվել անպատեհ հայտարարություններ անել զոհված զինծառայողների մարմինների թեմայի վերաբերյալ:

Նա նշել է, որ Հալաջյանը նախ սխալ գումարների մասին է խոսել. «Աղջիկ ջան, եթե դու ինֆորմացիային չես տիրապետում, խեղաթյուրված ինֆորմացիայի հիման վրա ես լայվեր անում, ավելի լավ է չանես: Գումարներից ես խոսում, թվերդ սխալ ես ասում, կարող եմ թվերն էլ ասել»,- նշել է Ղուկասյանն ու մանրամասնել, թե ինչ չափի գումարներով է պետությունը տարբեր փուլերում աջակցում զինծառայողների հարազատներին: 

«Մենք բոլորս պատրաստ ենք ինչքան մեզ փող են տվել, տանք քեզ: Հաշվեհամարդ ասա, սաղ ուղարկեմ, բայց դե դու էլ ինձ իմ զոհված ախպորը ու իմ ախպոր անհետ կորած բալին պիտի տաս: Ինձ էդ փողերը պետք չեն, ինձ իրենք են պետք, տալիս եմ սաղ քեզ, բեր իմ ախպորը տուր ինձ: Չգիտես՝ ինչի մասին ես խոսում՝ մի խոսիր. պետությունը փող է տալիս, թքած ունեմ ամենամեծ փողի վրա: Ասում է՝ կարգին կարաք ապրեք էդ փողով: Մենք մեր մեռելը աճուրդի չենք հանում, աղջիկ ջան, որ մեզ դրա համար փող տան, մենք էլ ձայն չհանենք, ասենք՝ դե լավ, ախպերս գնաց, զոհվես, էսքան փող տվեցին ընտանիքին, կապրենք: Էդ ինչ համեմատականներ ես տանում, ինչ զուգահեռներ ես տանում»,- ասել է Ղուկասյանը: