Խնդրում եմ՝ վերանայել Ձեր վարքագիծը. Աննա Գրիգորյանը՝ Լենա Նազարյանին

Այո, սա ապտակ էր հայ հասարակությանը, պետությանը, պետականությոանը. այնտեղ ոչ միայն մեր տղաների մասունքներն էին, այնտեղ ազգային արժանապատվությունն էր նետված: Այդ մասին այսօր Ազգային ժողովում ասաց անկախ պատգամավոր Աննա Գրիգորյանը՝ խոսելով պատերազմում զոհված զինծառայողների մարմինները պարկերում պահելու երևույթին:

«Երեկ նախարարն իր հարցազրույցում ասում է՝ սա պետք է քաղաքական շահարկման թեմա չդարձնել: Մենք սա քաղաքական շահարկման թեմա չենք դարձնում, բայց որևէ մեկը կարո՞ղ է սրա համար պատասխանատվություն կրել: Եվ անընդունելի է այն թեզը, որ սա միակ, եզակի դեպք է եղել: Եթե սա եզակի դեպք լիներ, միայն մեկ զինվորի մասունք լիներ, դուք պետք է պատասխանատվության ենթարկվեիք: Առհասարակ մեր երկրում պատասխանատվության ինստիտուտ գոյություն ունի՞, թե՞ ոչ: Օրինակ՝ այսօր ո՞վ է պատասխանատու Սյունիք և Գեղարքունիք ներխուժած ադրբեջանցիների համար: Մարդ կա՞, որ սրա համար պատասխանատվության ենթարկվի: Ո՞վ է պատասխանատու, որ մեր իսկ տարածքից 6 զինծառայող է գերեվարվում»,- հարցրեց պատգամավորը: 

Աննա Գրիգորյանն անդրադարձավ նաև Ազգային ժողովի փոխնախագահ Լենա Նազարյանի կողմից Թագուհի Թովմասյանին վիրավորելուն, երբ Նազարյանը Թովմասյանին անվանել էր «իդիոտկա» և արդարացնելով իրեն՝ ավելի ուշ ասել էր, որ իրենք էլ համբերություն ունեն: 

«Տիկին Նազարյան, ես վստահ եմ, որ Դուք ունեք զգացմունքներ: Անկախ այն բանից, թե որ քաղաքկան թիմում եք գտնվում, Դուք մայր եք ու կին եք, և տիկին Թովմասյանը խոսել է իր զգացմունքներից, խոսել է որպես քաղաքական գործիչ, խոսել է որպես մայր: Եվ Ձեր արձագանքն ինչպիսի՞ն է: Փոխանակ Դուք ևս ինչ-որ կերպ արտահայտեք ստեղծված իրավիճակի նկատմամբ: Խնդրում եմ՝ վերանայել Ձեր վարքագիծը»,- ասաց Գրիգորյան: