Պերմյակովի դատական նիստի մուտքը կլինի ազատ

Ավետիսյանների սպանության գործով դատական նիստի մուտքը քաղաքացիների եւ լրատվամիջոցների համար ազատ կլինի՝ միայն անձը հաստատող փաստաթղթով: Այս մասին լրագրողների հետ զրույցում հայտարարեց Շիրակի մարզի առաջին ատյանի ընդհանուր իրավասության դատարանի նախագահ Գագիկ Հովհաննիսյանը։

Նրա փոխանցմամբ՝ ուղիղ եթերով հեռարձակումներ կլինեն Գյումրիի դատարանի շենքում։ Այս ամենը ապահովելու համար, ռազմաբազայի դատարանի դահլիճում ԶԼՄ-ների տեսախցիկներից զատ կաշխատեն եւս երկու տեսախցիկ, որոնք կանջատվեն միայն դատական նիստի ավարտից հետո։

«Եթե լինի 100 ուղիղ եթեր հեռարձակող, ապա մենք կապահովենք այդ հարյուրի համար համապատասխան պայմաններ։ Բոլորի համար մուտքը ազատ կլինի։ Մենք որոշել ենք, որ դատարանի շենքի մոտ խփենք երկու վրան։ Մեկը կլինի լրատվամիջոցների համար, մյուսը՝ քաղաքացիների»,-հայտարարեց դատական դեպարտամենտի ղեկավար Կարեն Փոլադյանը:

Անդրադառնալով գյումրեցիների կողմից կանխատեսվող հնարավոր հանրահավաքի կազմակերպմանը՝ Կարեն Փոլադյանը նկատեց. «Սա մեր ազգի խնդիրն է։ Եթե մենք գոռուն գոչյուններով գնանք՝ոչինչ չի փոխվի»։

Լրագրողների դիտարկմանը, թե Վալերի Պերմիակովը նախորդ դատական նիստի ժամանակ բարձր չի խոսել և դեմքը դահլիճին ուղղված չի եղել, Կարեն Փոլադյանը պատասխանեց. «Դրա դեմքը ոչինչ չասող դեմք է. կմտնեք, կտեսնեք»։

Թե ով կվարի դատական նիստը, առաժմ անուներ չեն տալիս, հայտնի է միայն, որ այն կմեկնարկի դեկտեմբերի 18-ին՝ժամը 12։00-ին: