Եթե Փաշինյանը վերարտադրվի, ականատեսը կլինենք Հայաստանի պետականության վերջին էջի շրջմանը. Նաիրա Զոհրաբյան

«Ամեն ինչ անելու եմ որպես դեռևս պատգամավոր, որպես քաղաքական գործիչ, որպես քաղաքացի, որ Նիկոլն ու նիկոլականությունը հունիս 20-ին Հայաստանում փակեն իրենց վերջին էջը»: Այս մասին լրագրողների հետ զրույցում ասաց պատգամավոր Նաիրա Զոհրաբյանը:

Նա նկատեց, որ այս պահին կարծես սահմաններին վիճակն անկառավելի է՝ կան զոհեր և նոր գերիներ: Զոհրաբյանը տեղեկացրեց, որ առաջարկ կա արտահերթ նիստ հրավիրելու, սակայն չի վանկանում, որ Նիկոլ Փաշինյանը մասնակցի այդ նիստին:

«Նա օգտագործելու է ցանկացած հարթակ խոսելու ամեն ինչի մասին, բացի բուն խնդրից: Առաջարկել եմ գան կոնկրետ այս իրավիճակի պատասխանատուները՝ պաշտպանության նախարար, Գլխավոր շտաբի պետ, կորպուսի հրամանատարներ, բայց ոչ Նիկոլ Փաշինյանը»,- ասաց Զոհրաբյանը:

Նա նկատեց նաև, որ այս իրավիճակում ընդդիմադիր ուժերը ևս պետք է քայլել ձեռնարկեն, մինչդեռ բոլորը լռում են:

«Ամեն մեկդ, որ զբաղված եք բուկլետ ու պլակատ տպելով, հասկանո՞ւմ եք, որ վաղը կարող է ուշ լինել, ու ձեր քարոզարշավը, բուլկետը որևէ մեկին պետք չլինի: Ընդդիմությունը հիմա պետք է լիներ փողոցում, արտահերթ հավաք հրավիրեր, ժողովրդին ներկայացներ իրավիճակը, պարտադրեին Փաշինյանի հրաժարականը, քանի որ այդ մարդն այլևս ունակ չէ ադեկվատ բանակցություններ վարել:

Հիմա անելիքը քաղաքական ուժերինն է, առաջին հերթին ընդդիմությանը, քանի որ Հայաստանում այլևս իշխանություն չկա, Հայաստանում կա մեկ մոլագար պոպուլիստ, որն այսօր Հայաստանի ազգային անվտանգությունը, տարածքային ամբողջականությունը վտանգում է: Ընդդիմության լռությունը, պլատա, բուլետ տպելու փուլն ինձ համար հասկանալի չէ»,- ասաց Զոհրաբյանը:

Նա նկատում է, որ չի ասում, թե եթե Փաշինյանը չլինի՝ վաղը Շուշին, Հադրութը վերադարձվելու է, սահմանային միջադեպերը դադարելու են, սակայն գոնե կգա ադեկվատ իշխանություն, որը կարող է բանակցություններ վարել և իրավիճակ փոխել:

«Եթե Փաշինյանը վերարտադրվի, ինչին, չնայած, չեմ հավատում, կնշանակի՝ մենք ձեզ հետ, ցավոք սրտի, ականտեսը կլինենք Հայաստանի պետականության վերջին էջի շրջմանը»,-ընդգծեց Զոհրաբյանը: