Սահմաններին թաքնված ձևով պատերազմ է. Արմեն Ռուստամյան

«Այսօր խոսել լուրջ բանակցային գործընթացի մասին, թերեւս անիմաստ է»: Այս մասին այսօր Ազգային ժողովում լրագրողների հետ զրույցում հայտարարեց ՀՅԴ խմբակցության ղեկավար Արմեն Ռուստամյանը:

Նրա դիտարկմամբ սահմաններին թաքնված ձեւով պատերազմ է, որի դեմն առնելու միակ միջոցը մեր զինուժն է, պաշտպանունակությունը:

Արմեն Ռուստամյանը հույս ունի, որ Ադրբեջանը կսթափվի այն տրամաբանությունից, որ մեկին տասը պատասխան կորուստներ են ունենալու:

Նա չի բացառում, որ ռուս-թուրքական լարված հարաբերությունների համատեքստում հենց Թուրքիան է հրահրում ասիմետրիկ գործողություններ՝ այդպիսով շեղելով միջազգային հանրության ուշադրությունն իր խնդրից:

«Ռուս-թուրքական լարված հարաբերությունները զգաստացրել են Թուրքիային, եւ չեմ բացառում՝ Թուրքիան ասիմետրիկ գործողություններով շեղի ուշադրությունը»,-նկատեց Ռուստամյանը:

Նա սահմանի լարվածությունը կապում է նաև միջազգային հանրության կողմից ընդունված հակահայկական բանաձեւերի հետ:

«Եվրախորհրդում ընդունած բանաձեւերը էսկալացիա են առաջացնում սահմանների վրա, որովհետեւ Ադրբեջանին ավելի սանձարձակ են դարձնում: Եթե հասել ենք նրան, որ մի փաստաթուղթ է հրապարակվել, որ Ադրբեջանը կարողացավ Եվրոպայի խորհրդին դարձնել գործիք հայկական արշավի մեջ, դա պիտի սթափեցնի բոլորին»,-ասաց Ռուստամյանը: