«Հայ-ադրբեջանական լայնամասշտաբ ռազմական գործողություններ չեն լինելու». Արման Նավասարդյան

Քաղաքագետ Շուշան Խաթլամանջյանը կասկածում է, որ Հայաստանի ու Ադրբեջանի նախագահների հանդիպումն այս տարի տեղի կունենա: Իսկ եթե նույնիսկ տեղի ունենա, ապա իրավիճակը դրանից չի բարելավվի:

Այդ մասին, նա ասաց լրագրողների հետ հանդիպման ժամանակ:

«Տպավորություն է ստեղծվում, որ նպատակը քաղաքական իրավիճակը ինչ-որ լարվածության կետի հասցնելն է»,-նշել է Շուշան Խաթլամաջյանը:

Ռուս-թուրքական հարաբերությունների վատթարացումը, ըստ քաղաքագետի, այդ ռազմավարության մեկ էջն է:

«Թուրքիան ցույց է տվել, որ այնքան էլ չի գնահատում Ռուսաստանի հետ հարաբերությունները: Հայաստանի համար իրավիճակը նույնպես հեշտ չէ, քանի որ Թուրքիան փաստացի հարձակվել է մեր ռազմավարական դաշնակցի վրա: Դա կարող է հանգեցնել փոքր զինված բախման, սակայն լայնամասշտաբ պատերազմի մասին դեռ վաղ է խոսել»,-ամփոփել է քաղաքագետը:

Այն, որ Հայաստանի եւ Ադրբեջանի նախագահների առաջիկա հանդիպումը բացարձակապես ոչինչ չի տա, լրագրողների հետ հանդիպմանը հայտարարեց նաև ՀՀ նախկին փոխարտգործնախարար, արտակարգ եւ լիազոր դեսպան Արման Նավասարդյանը:

«Հայ-ադրբեջանական լայնամասշտաբ ռազմական գործողություններ չեն լինելու»,- ասաց բանախոսը:

Ինչ վերաբերում է ռուս-թուրքական լարված հարաբերություններին՝ապա, ըստ Նավասարդյանի` ռուս-թուրքական պատերազմ իհարկե չի լինի, սակայն երկու երկրների միջեւ հարաբերություններն անկասկած կանդրադառնա տարածաշրջանային իրադարձությունների վրա։ Ռուսաստանը Թուրքիայի դեմ կօգտագործի քրդական գործոնը: