Ընտրություններն ավելի են խորացնելու ճգնաժամը, հիմա դրա ժամանակը չէր. Արա Աբրահամյան (տեսանյութ)

Ռուսաստանի հայերի միության նախագահ Արա Աբրահամյանի գլխավորած «Մեր տունը Հայաստանն է» կուսակցությունն առաջիկա խորհրդարանական ընտրություններին կմասնակցի «Ալյանսի» հետ դաշինքով։ Այս մասին Արա Աբրահամյանը տեղեկացրեց մամուլի ասուլիսի ժամանակ:

Ընդհանուր առմամբ, նա գիտակցում է և վստահ է, որ ընտրական գործընթացը կարող է խորացնել ճգնաժամը, սակայն քանի որ այն այնուամենայնիվ պետք է տեղի ունենա, ապա ինքը ևս դեմ չէ մասնկացել, հատկապես, որ ունի տեսլական՝ Հայաստանի զարգացման ուղղությամբ:

«Դե պատկերացրեք՝ մինչև ընտրություններ կազմակերպեն, ընտրություններից հետո մինչև էս կողմ, էն կողմ՝ ձմեռ է գալու... իսկ մենք գերիների, անհետ կորածների ու տարածքների հարց ունենք անհապաղ լուծելու»,-ասաց Աբրահամյանը:

Իսկ ավելի կոնկրետ, Արա Աբրահամյանն ինքն անձամբ չի մասնակցելու ո՛չ խորհրդարանական ու ո՛չ էլ վարչապետի ընտրություններին: Նա դաշիքն է կազմել  «Ալյանսի» հետ ու կաջակցի այդ կուսակցությանը՝ կյանքի կոչել իր ծրագրերը՝ կապված Հայաստանի հետ:

Համագործակցելու և միասնաբար հանդես գալու համար բանակցում են նաև մի քանի այլ կուսակցությունների և հասարակական կազմակերպությունների հետ։

Աբրահամյանը կոչ է անում տարբեր ուժերի համախմբվել ու միասին ճանապարհային քարտեզ գծել ստեղծված ճգնաժամային իրավիճակից դուրս գալու համար։ Կուսակցությունն իր ծրագրում կարևորում է Ռուսաստանի հետ դաշնակցային հարաբերությունների զարգացումն ու ամրապնդումը։

«Ռուսաստանը մեր ռազմավարական դաշնակիցն է, մեր գլխավոր գործընկերը, և մենք կզարգացնենք համագործակցությունը։ Դրա հետ մեկտեղ մենք պետք է նաև փոխշահավետ հարաբերություններ ունենանք տարբեր՝ մեծ ու փոքր երկրների հետ»,- նշեց նա։

Մանրամասները՝ տեսանյութում