Արկղի մեջ քվեաթերթիկ նետելով Հայաստանում արդյունքի չես հասնի

«Միակ տարբերակը փողոցային պայքարն է»: Այս մասին newspress.am-ի հետ հարցազրույցում ասաց «Նոր Հայաստան» փրկության ճակատի անդամ, ՀԽ փոխնախագահ Վարուժան Ավետիսյանը՝ անդրադառնալով ՀԱԿ-ի կողմից հանրաքվեի արդյուքներն անվավեր ճանաչելու ԿԸՀ ներկայացված դիմումի մերժմանը:

Վարուժան Ավետիսյանը նկատեց, որ «Նոր Հայաստանը» չի քննադատում ՀԱԿ-ի քայլերն ու դեմ չէ նրա դիրքորոշմանը, ավելին՝ իրենք միացել են հանրահավաքին ու միասին Կենտրոնական ընտրական հանձնաժողովի շենքի մոտ պահանջել են անվավեր ճանաչել հանաքվեն:

Սակայն, Վարուժան Ավետիսյանի խոսքով, փորձը ևս մեկ անգամ ցույց տվեց, որ պայքարի միակ միջոցը փողոցն է:

«Մենք տեսանք ու ևս մեկ անգամ հասկացանք, որ արկղի մեջ քվեարթերթիկ նետելով  Հայաստանում արդյունքի չես հասնի»,- ասաց Վարուժան Ավետիսյանը՝ հավելելով, որ հանաքվեն միայն օգնեց ձևավորել ժողովրդի տեսակետն ու ավելացնել անվստահությունն իշխանության նկատմամբ:

«Ժողովուրդը պետք է հասկանա, որ պայքարի միակ միջոցը փողոց դուրս գալն է: Եթե ուզում են ինչ-որ արդյունքի հասնեք, ապա պետք է հավաքեն ու միասնական պայքարեն»,- ասաց Ավետիսյանը:

Ինչ վերաբերում է ՀԱԿ-ի և «Նոր Հայաստանի» միավորմանը, ապա Վարուժան Ավետիսյանը նկատում է, որ միավորման ձևաչափի մասին խոսք չի եղել, թեև չի բացառում, որ իրենց ձևավորված պայքարում «Նոր Հայաստանին» կմիանան շատերը` «Մենք ստեղծել ենք հարթակ, որտեղ պատրաստ ենք ընդունել բոլոր նրանց, ովքեր կցանկանան միանալ մեր փողոցային պայքարին»:

Հիշեցնենք, որ երեկ՝ դեկտեմբերի 13-ին 3.5 ժամ տևած քննարկումից հետո ԿԸՀ բոլոր 7 անդամները միաձայն մերժեցին դեկտեմբերի 6-ի հանրաքվեի արդյունքները անվավեր ճանաչելու մասին ՀԱԿ-ի դիմումը:

ԿԸՀ-ը տարածած հաղորդագրության համաձայն ՝ «2015թ. դեկտեմբերի 6-ին հանրաքվեի դրված ՀՀ Սահմանադրության փոփոխությունների նախագիծն ընդունված է»: