Ես դեռ այդ մասին չեմ ուզում խոսել` Զուրաբյանը ԿԸՀ արձանագրության մասին

Երեկ՝ դեկտեմբերի 13-ին, Հայաստանի կենտրոնական ընտրական հանձնաժողովը մերժեց դեկտեմբերի 6-ի հանրաքվեի արդյունքները անվավեր ճանաչելու մասին ՀԱԿ-ի դիմումը: ՀԱԿ խմբակցության ղեկավար Լևոն Զուրաբյանի համար այնքան էլ անակնկալ չէր:

Համենայնդեպս դեռ երեկ ՀԱԿ խմբակցության քարտուղար Արամ Մանուկյանը լրագրողների հետ զրույցում, նկատել էր, որ ՀԱԿ-ը հույս չունի, թե հանրաքվեի արդյունքերն անվավեր կճանաչեն:

Newspress.am-ի հարցին, թե որն է ՀԱԿ-ի հետագա քայլերը հանրաքվեն վավեր ճանաչելուց հետո, Լևոն Զուրաբյանը հստակ պատասխան չտվեց:
«Ես դեռ այդ մասին չեմ ուզում խոսել» ,- պատասխանեց նա:

Հիշեցնենք, որ ՀԱԿ-ը, հիմք ընդունելով հանրապետության 200 տեղամասերում կատարված ընտրակեղծիքները, Կենտրոնական ընտրական հանձնաժողովի քննարկմանն էր ներկայացրել դիմում՝ հանրաքվեի արդյունքներն անվավեր ճանաչելու մասին:

Երեկ՝ 3.5 ժամ տևած քննարկումից հետո ԿԸՀ բոլոր 7 անդամները միաձայն մերժեցին ՀԱԿ դիմումը:

ԿԸՀ-ը տարածած հաղորդագրության համաձայն ՝ «2015թ. դեկտեմբերի 6-ին հանրաքվեի դրված ՀՀ Սահմանադրության փոփոխությունների նախագիծն ընդունված է»: