Բռնցքամարտիկների 40.000 դրամ աշխատավարձն ու Գևորգյանի 350 հազար եվրոյի ավտոմեքենան

Կան մարդիկ, ում պահվածքը, գործելակերպն ու արտահայտած մտքերը, մեղմ ասած, զարմանք են առաջացնում։

Խոսքը՝ ՀՀ բռնցքամարտի ֆեդերացիայի նախագահ, ՀՀԿ պատգամավոր Արթուր Գևորգյանի մասին է. Դավթաշեն համայնքի նախկին թաղապետի, ոստիկանապետ Վովա Գասպարյանի փեսայի, պատգամավոր Ռուբեն Գևորգյանի (Ծաղիկ Ռուբոյի) եղբոր որդու:

Նրա մասին խոսելիս կարելի է ուղղակի ասել. տղայի բախտը շատ է բերել։

Չի կարելի ասել, թե առանձնակի շնորհներով է օժտված, բայց արի ու տես, որ բավական մեծ կարծիք ունի իր և իր ճշմարտացիության վերաբերյալ։  Նա մի օր քնեց-զարթնեց ու որոշեց որպես Հայաստանի բռնցքամարտի ֆեդերացիայի նախագահ, ասել է թե, Հայաստանի բռնցքամարտիկների «տեր ու տիրակալ», մամուլի ասուլիս հրավիրել ու ներկայացնել կատարված աշխատանքները։

Թե վերջին տարիներին քանի՞ բռնցքամարտիկ է միջազգային ասպարեզներում հաջողությունների հասել, այլ հարց է։ Թե ի՞նչ պայմաններում են մարզվում հայ բռնցքամարտիկները Արթուր Գևորգյանի հովանու նեքո՝ դա էլ։ Սակայն այն, թե ինչ վերաբերմունքի են նրանք արժանանում, ամբողջությամբ բացահայտվեց ասուլիսի ընթացքում։

Պարզվում է, տղաները 40000 դրամ աշխատավարձ են ստանում։ Հաշվարկն այնպես է կատարված, որ հերիքի տրանսպորտի ծախսերին միայն։ Եթե ուզում են ավելի լավ ապրել, պետք է Եվրոպայի ու աշխարհի չեմպիոն դառնան։ Ավելի լավ ապրելու համար՝ Օլիմպոսի բարձունքները նվաճեն։

Հարց է առաջանում, իսկ ի՞նչ բարձունքներ է նվաճել ինքը՝ Արթուր Գևորգյանը, որ 350 հազար եվրո արժողությամբ ավտոմեքենա է վարում։
Օլիմպիական չեմպիոնի տիտղոսը հաստատ հասու չէր նրան, իսկ թաղապետի կամ պատգամավորի աշխատավարձով՝ այդքան դժվար թե ձգեր, եթե…

Պրոֆեսիոնալ ռինգում հայ մարզիկների գրանցած հաջողություններն ակնհայտն են։ Սակայն, որպես կանոն, նրանք հեռանում են Հայաստանից ու իրենց հաջողությունները գրանցում օտար երկրների դրոշի ներքո, որովհետև այնտեղ նրանք առավել են գնահատված։

Կային ժամանակներ, երբ հայ բռնցքամարտիկները սիրողական բռնցքամարտում ևս միջազգային հեղինակավոր մրցամարտերում հաղթանակներ էին գրանցում։ Իսկ հիմա… Հիմա փաստն այն է, որ առաջիկա օլիմպիական խաղերին մեր բռնցքամարտիկներից և ոչ ոք չի մասնակցի, ինչը նշանակում է, որ վարկանիշային մրցամարտերում մեր մարզիկները ցուցանիշներ շատ-շատ ցածր է եղել։