Տղայիս դեպքի վայրից տարել էին` չգիտեմ, թե ով. Շատվանի գյուղապետ

Դեկտեմբերի 11-ին Սևան-Մարտունի-Գետափ ավտոճանապարհին տեղի էր ունեցել խոշոր  ավտովթար, որի հետևանքով 3 հոգի տեղում մահացել էր, իսկ Mercedes-ի վարորդը մահացածներին թողնելով անօգնական՝ դեպքի վայրից դիմել էր փախուստի, այս մասին հաղորդել էր shamshyan.com-ը:

Փախուստի դիմած վարորդը Գեղարքունիքի մարզի Շատվան գյուղի գյուղապետի 40-ամյա որդի Տիգրան Լևոնի Աբրահամյանն է: Իսկ նրա քույրը Առողջապահության նախարարության լիցենզավորման բաժնի պետն է:

Երեկ տեղեկություն տարածվեց, որ վարորդը հայտնաբերվել է և նրան տեղափոխվել է «Էրեբունի» բժշկական կենտրոն:

Newspress.am-ի հետ զրույցում Շատվան գյուղի գյուղապետ Լևոն Աբրահամյանը հերքեց, որ որդին փախուստի է դիմել:

«Ինքը շատ վատ վիճակում ա եղել, ի վիճակի չի եղել շարժվելու: Իրան տարել են»,- ասաց գյուղապետը:

Նա չմանրամասնեց, թե որդուն վթարից հետո ուր են տարել, քանի որ վթարից մեկ օր անց է դիմել բժշկական օգնության:

«Ես չեմ կարա ասեմ, թե դեպքի վայրից ով ա իրան տարել, բայց փաստ ա, որ իմ որդին փախուստի չի դիմել: Ինչ ասես դուրս են տալիս»,- բարկացած նշեց նա:

Վերջինս նաև ցավակցեց վթարի հետևանքով մահացածների հարազատներին` ասելով, որ շատ է ցավում ողբերգական ավտովթարի համար:

Հիշեցնենք, որ դեպքի առթիվ հարուցվել է քրեական գործ ՀՀ քր.օր-ի 242 հոդվածի 3-րդ մասի (ճանապարհային երթևեկության և տրանսպորտային միջոցների շահագործման կանոնները խախտելը, որն անզգուշությամբ առաջացրել է 2 կամ ավելի մարդու մահ) և 244 հոդվածի (ճանապարհատրանսպորտային պատահարի վայրը թողնելը, տրանսպրոտային միջոց վարող և ճանապարհային երթևեկության կամ տրանսպորտային միջոցների շահագործման կանոնները խախտած անձի կողմից ՀՀ քր.օր-ի 242 հոդվածով նախատեսված հետևանքների առաջացման դեպքում) հատկանիշներով:

Լուսանկարը` shamshyan.com