Եթե Ադրբեջանը զենք է գնում, ուրեմն ուշ թե շուտ այդ զենքը պետք է կրակի

Թուրքիան փորձում է համոզել միջազգային հանրությանը, որ ինքը պայքարում է ԻՊ-ի դեմ, մինչ դեռ իրականում Թոուրքիան այն երկիրն է, որը կողմնակի, թե անկողմնակի ֆինանսավորում է ԻՊ-ին:

Այս մասին newspress.am-ի հետ զրույցում ասաց «Ժառանգություն» խմբակցության պատգամավոր Թևան Պողոսյանը:
«Թուրքիան ԴԱԻՇ-ին աջակցելու նպատակով անգամ իր երկրի սահմանը բաց է թողել, որպեսզի բոլորն անարգել դուրս գան և անդամագրվեն այդ կազմակերպության: Այստեղ միջազգային հանրության խնդիրն է այս երևույթի դեմ առնել»,- ասաց Թևան Պողոսյանը:

Նրա դիտարկմամբ Եվրոպան մի կողմից ներգրավում է Թուրքիային իր գործերին, մյուս կողմից էլ փորձում է հսկողության տակ պահել նրան` խայծի օգնությամբ:

«Սա քաղցրաբլիթ շպրտելու նման մի բան է: Երբ երկիրը չի լսում, իսկ դու քաղցրաբլիթ ես շպրտում ու փորձում սիրաշահել»,- նկատեց բանախոսը:

Ինչ վերաբերում է Հայաստան-Ադրբեջան հարաբերություններին ու Թուրքիայի ներգրավվածության այս ձևաչափին, ապա Թևան Պողոսյանը չի զարմանա, եթե Թուրքիան խրախուսելիս լինի Ադրբեջանին` հրադադարի խախտման գործողություններում: Հատկապես, որ Թուրքիան գիտակցում է, որ այն իրավիճակում, որտեղ այժմ ինքն է հայտնվել` Ադրբեջանը միջազգային հանրության ուշադրությունն իրենից շեղելու լավագույն տարբերակն է:

«Միջազգային հանրությունը պետք է իր ձեռքը վերցնի իրավիճակն ու հասկանա, որ ինչքան զենք զինամթերք վաճառի Ադրբեջանին, այնքան հարցն այլ երանգ կստանա: Եթե Ադրբեջանը զենք է գնում, ուրեմն ուշ թե շուտ այդ զենքը պետք է կրակի»,- նշեց Թևան Պողոսյանը` հավելելով, որ միջազգային հանրությունը չպետք է վաճառի զենքն ու հայտարարի, թե իր վերահսկողության տակ է ամեն ինչ:

Մասնավորապես, անդրադառնալով հրասայլից հայկական կողմի ուղղությամբ կրակոցին` նա նկատեց. «Եթե Ադրբեջանը տանկ է գնել, հո դա չի առել, որ դնի ցուցահանդեսում ու վրայի փոշին մաքրի: Առել է, որ դրանով մի օր կրակի»: