Գարեգին Նժդեհի արձանի ապամոնտաժումը կանխելու համար Մարտունիում հերթապահություն է սահմանվել . ավագանու անդամ

Մարտունիում՝ Գարեգին Նժդեհի արձանի մոտ հերթապահություն է սահմանվել, որ առանց համաձայնության այն հանկարծ չապամոնտաժվի։ «Փաստինֆո»-ի հետ զրույցում այս մասին հայտնել է Մարտունի քաղաքի ավագանու անդամ Արտակ Մկրտչյանը։

Նրա փոխանցմամբ՝ մինչ այսօր չեն հասկանում, թե ո՞ւմ պահանջով պետք է արձանն ապամոնտաժվի և ինչո՞ւ, փոխարենը շրջանառվում են տարբեր վարկածներ։ Դրանցից մեկն այն է, որ նման հարց է բարձրացրել արձանի քանդակագործը՝ պատճառաբանելով, թե արձանի վրա որոշ աշխատանքների անհրաժեշտություն կա, պետք է կիսատ աշխատանքներն ավարտին հասցնի։ Մկրտչյանը նշեց, որ դրանք խոսակցություններ են ինքը տեղեկություններին ամբողջական չի տիրապետում։ Ըստ նրա՝ քանդակագործը կարող է տեղում դրանք իրականացնել, քանի որ այնպիսի գործեր չեն, որ պետք է տեղափոխվի։

Այդուհանդերձ, մարտունեցիները շարունակում են մտավախություն ունենալ, թե արձանը կարող է տեղափոխվել մայիսի 9-ին ընդառաջ, չնայած ԱՀ նախագահի խոսնակը նշել էր, որ միայն քաղաքացիները կարող են որոշել՝ տեղափոխել արձանը, թե ոչ։

Արտակ Մկրտչյանը նշեց, որ Արցախի անվտանգության խորհրդի քարտուղար Վիտալի Բալասանյանը մայիսի չորսին Լեռնային Ղարաբաղի Մարտունի քաղաքում առաջարկել է ապամոնտաժել Գարեգին Նժդեհի արձանը։Որպես ավագանի իրեն տեղյակ են պահել, որ արձանի հարցով Բալասանյանը լինելու է Մարտունիում։ Վերջինս Բալասանյանին անձամբ չի հանդիպել, համախոհներն ու ընկերներն են հանդիպել Արցախի Անվտանգության խորհրդի քարտուղարին՝ հուզող հարցերը փոխանցելու։

Մանրամասները՝ սկզբնաղբյուրում։