Իմ նշանակումն ԱԱԾ տնօրենի պաշտոնում, հերթական նշանակում չէր. Վանեցյան

Երբ ես նշանակվել եմ ԱԱԾ տնօրեն, դա սովորական, հերթական նշանակում չէր. երկրում տեղի էին ունեցել մեծ փոփոխություններ, երկրում տեղի էր ունեցել, այն ժամանակ ասում էին, հեղափոխություն, հիմա մենք հասկանում ենք, որ դա հեղաշրջում էր: Այս մասին ասօր ԱԱԾ պահեստազորի սպաների միություն ՀԿ-ի ասուլիսի ժամանակ ասաց ԱԱԾ նախկին տնօրեն Արթուր Վանեցյանը:

«Այդ ժամանակ ես դարձել եմ ԱԱԾ առաջին տնօրենը: Կար մի կարծրատիպ մեր բնակչության շրջանում, երբ մեզ նույնականացնում էին հին շրջանի, վատ բարքերի, ԿԳԲ-ի հետ այլն, և կար խնդիր այդ կարծրատիպը կոտրելու, որպեսզի մեր ծառայությանը մարդիկ սկսեին վստահել, հավատալ, մեր մեջ տեսնեին ոչ թե սպառնալիք, այլ վստահություն և մարդկանց, ովքեր կանգնած են հայրենիքի և ժողովրդի պաշտպանության համար»,- ասաց ԱԱԾ նախկին տնօրենը:

Նրա խոսքով՝ կարճ ժամանակում ԱԱԾ-ն Հայաստանում դարձավ ամենահեղինակավոր կառույցներից մեկը:

«Մենք իրար հետ, ուս-ուսի տված արել ենք շատ մեծ գործ, գրանցել ենք շատ մեծ արդյունքներ և փորձել ենք ամեն ինչ անել, որպեսզի երկիրը կայունանա: 2019 թվականի սեպտեմբերին ես իմ հրաժարականի դիմումի մեջ փորձել եմ մատչելի կերպով ներկայացնել այն պատճառները, որոնք դրդեցին ինձ այդ հրաժարականին: Այն կանխատեսումները, որոնք եղել են հրաժարականի տեքստում, ցավոք սրտի, գրեթե ամբողջությամբ իրականություն դարձան: Մենք կարող ենք տեսնել նաև միտում 3 տարում ԱԱԾ 5 տնօրենի փոփոխության մեջ, որովհետև այս կառույցում ղեկավարներին այդպես հաճախ չեն փոխում և եթե փոխում են, պետք է լինի հստակ բացատրություն: Ես և պարոն Համբարձումյանը հստակ մատնանշել ենք մեր հրաժարականների պատճառները: Մնացած տնօրենների հրաժարականնների մասին լայն հանրությունը որևէ բան չգիտի: Փորձելով թուլացնել ԱԱԾ-ն՝ այս իշխանությունները փորձել են թուլացնել պետության հիմքերը»,- ընդգծեց Վանեցյանը:

Իսկ թե ինչու են իրենք հրապարակային խոսքի միջոցով հանդես գալիս, Վանեցյանը բացատրեց այն հանգամանքով, որ այլ գործիքակազմ չունեն:

«Մենք պետք է խոսքով մեր հանրությանը, մեր ժողովրդին բացատրենք, թե ինչ է իրականում կատարվում մեր երկրում»,- նշեց Վանեցյանը: