Կոմայի մեջ գտնվող զինծառայողի ծնողների հետ անշնորհք ձևով են վարվել Սոցապնախարարությունում. պատգամավորն ահազանգում է

Ինձ դիմել են վիրավոր զինծառայողի ծնողներ, ով այս պահին գտնվում է կոմայի մեջ, իսկ ծնողի հետ Աշխատանքի և սոցիալական հարցերի նախարարության ստորին օղակներում ներկայացված աշխատակազմը, մեղմ ասած, շատ անշնորհք ձևով է վարվել: Այդ մասին Ազգային ժողովում, դիմելով ՄԻՊ Արման Թաթոյանին, ասաց ԱԺ «Լուսավոր Հայաստան» խմբակցության պատգամավոր Աննա Կոստանյանը:

Նա հետաքրքրվեց կա՞ն տեղեկություններ զոհված կամ վիրավոր զինծառայողների ծնողների կողմից, ովքեր փաստել են, որ իրենց նկատմամբ անբարյացկամ վերաբերմունք է դրսևորվել այն պատկան մարմինների կողմից, որտեղ իրենց երեխաների խնդիրների հետ կապված դիմել են:

Պատասխանելով՝ Թաթոյանը նշեց, որ վիրավորված և զոհված զինծառայողների հարազատների նկատմամբ համակարգված վատ վերաբերմունք իրենք չեն նկատել:

«Կարող է ինչ-որ եզակի դեպքեր լինեն, մենք դրանցից յուրաքանչյուրին արձագանքում ենք, դա անթույլատրելի է: Նրանց հետ կապված գլխավոր խնդիրը միշտ ինֆորմացիայի պակասն է: Պատերազմից հետո անհայտ կորածների հարազատները կարիք ունեն, որ պետությունն աշխատի իրենց հետ, ինֆորմացիա տրամադրի անընդհատ, հարգալից լինի և այլն, բայց համակարգված խնդիր մենք չենք արձանագրել»,- ասաց Թաթոյանը: