Ստացվում է, որ զրպարտությունը և վիրավորանքը քրեականացվում են. Թագուհի Թովմասյանը՝ ԱԺ բերված նախագիծը «մի քանի քայլ հետ» որակեց

Նախագիծը, որ ներկայացվել է երկրորդ ընթերցմամբ քննարկման և վստահ եմ նաև քվեարկվի, իր մեջ պարունակում է բազմաթիվ ռիսկեր, խոսքի ազատության դեմ ուղղված կոնկրետ գործողություններ. այս մասով իր մտահոգությունն է հայտնել նաև ՀՀ ՄԻՊ-ը: Այդ մասին այսօր Ազգային ժողովում ասաց անկախ պատգամավոր Թագուհի Թովմասյանը:  

«Ես ուզում եմ արձանագրել, որ այս նախագիծը մի քանի քայլ հետ նախագիծ է, որովհետև երկար ժամանակ պահանջվեց, որպեսզի ապաքրեականացվի զրպարտություն և վիրավորանք ձևակերպումը: Հիմա ստացվում է, որ զրպարտությունը և վիրավորանքը քրեականացվում են»,- ասաց Թովմասյանը: 

Նա նշեց, որ նախագիծը խորհրդարան բերելով՝ մամուլի ազատության դեմ կոնկրետ ոտնձգություն է արվում:

«Ակնհայտորեն լրագրության դեմ իրականացվող քայլերը հաջորդում են մեկը մյուսին, հաջորդն էլ եք բերում, մյուսն էլ եք բերելու: Դրանք գտնվում են օրակարգում: Եվ այսօր լրագրողներն ակցիա էին իրականացնում մյուս օրենքի հետ կապված: Ես ուզում եմ ուղղակի այստեղ հայտարարել, որ լինելով լրագրողի իշխանություն՝ ես ակնկալում էի, որ այլ վերաբերմունք կլիներ լրագրողների և խոսքի ազատության նկատմամբ: Հիմա ստացվում է, որ եթե նույնիսկ մենք ուզում ենք լրագրողներին որևէ կերպ օգնել, նպաստել դաշտի ազատ գործունեությանը, մենք մեր բոլոր քայլերով իրականացնում ենք հակառակը: Ինչքան էլ հակափաստարկներ ներկայացվեն, որևէ արդարացում չունի, որովհետև ամենաբարձր միջազգային իրավապաշտպան կազմակերպություններն արձանագրել են, որ Հայաստանում մամուլի ազատությունը մտահոգիչ վիճակում է»,- եզրափակեց պատգամավորը: