Փաշինյանը վարչապետի պաշտոնում այլևս պաշտոնավարելու իրավունք չունի, դա 300-րդ հոդվածի 2-րդ մասի հատկանիշներով ենթադրյալ հանցագործության դրսևորման վարքագիծ է. Ղազարյան

Նախկին վարչապետ Նիկոլ Փաշինյանի կողմից հրաժարականի դիմում ներկայացնելուց հետո, երբ նախագահն ընդունում է այդ հրաժարականը և դրա արդյունքում ընդունում է կառավարության հրաժարականը, նա այլևս վարչապետի պաշտոնում պաշտոնավարելու որևէ իրավունք չունի: Այդ մասին այսօր կառավարության դիմաց լրագրողների հետ զրույցում ասաց ՀՀ սահմանադրական դատարանի աշխատակազմի ղեկավար Էդգար Ղազարյանը:

«Սահմանադրության այն դրույթը, որով սահմանվում է, որ կառավարության անդամները շարունակում են իրենց պարտականությունների կատարումը մինչև նոր կառավարության ձևավորումը, դա հասկանալիորեն վերաբերում է կառավարության մյուս բոլոր անդամներին, ովքեր հրաժարական չեն ներկայացրել: Իսկ այն պաշտոնյաները, ովքեր հրաժարական ներկայացրել են և ընդունվել է այդ հրաժարականը, մասնավորապես՝ Աշխատանքի և սոցիալական հարցերի նախարար Մեսրոպ Առաքելյանը և նախկին վարչապետ Նիկոլ Փաշինյանն այլևս այդ պաշտոնում պաշտոնավարելու իրավունք չունեն»,- ասաց Ղազարյանը:

Նա նշեց, որ տեսել ենք ցավալի իրողություն՝ Նիկոլ Փաշինյանը շարունակել է կատարել վարչապետի պարտականությունները, ներկայացել է կառավարության շենք, կայացրել է իր լիազորությունններից բխող որոշումներ, նշանակումներ է կատարել և այլն: Դա, ըստ Ղազարյան, 300-րդ հոդվածի 2-րդ մասի հատկանիշներով ենթադրյալ հանցագործության դրսևորման վարքագիծ է, այն է, որ պաշտոնյան իր լիազորությունների ավարտից հետո շարունակում է կատարել այդ պաշտոնի պարտականությունները:

«Երեկ տեղի է ունեցել մի նոր իրադարձություն, որը թարմացնում է գործընթացը. ԱԺ-ում քննարկվել է վարչապետի ընտրության հարցը, առաջադրվել է ընդամենը 1 թեկնածու: Որքան էլ տարօրինակ է, դա եղել է կիրակի օրը հրաժարական տված Նիկոլ Փաշինյանը, բայց պարզվում է, որ մեր պատգամավորները ցուցաբերել են խելամտություն, և նրան չեն ընտրել վարչապետի պաշտոնում: Մեր խորհրդարանում՝ խորհրդարանական կառավարման երկրում, 132 պատգամավորից նա վաստակել է ընդամենը մեկի վստահությունը՝ 1 կողմ, 3 դեմ, մյուսները՝ ձեռնպահ, այսինքն՝ պառլամենտը Նիկոլ Փաշինյանին չի ընտրել վարչապետի պաշտոնում: Եթե խորհրդարանական կառավարման երկրում խորհրդարանը դեմ է այս կամ այն անձին վարչապետի պաշտոնում տեսնելու գաղափարին, նշանակում է, որ նրա մտքով անգամ չպետք է անցնի այս շենք մտնելու, մինչև երբևէ նորից կընտրվի վարչապետ: Այսինքն՝ մենք այսօր հաստատ չունենք վարչապետ և ինձ համար կարևոր է ոչ միայն այն, թե նա ինչու է շարունակում պաշտոնավարել՝ խախտելով Սահմանադրությունը, այլ նաև, թե ինչ գործողություններ է իրականացնում՝ որպես քաղաքական գործիչ»,- ասաց Ղազարյանը: