Իշխանությունը որևէ մեկին լավություն չի անում, մենք ենք ընդառաջել, որ լինեն ընտրություններ. Էդմոն Մարուքյան

Ներքաղաքական ճգնաժամի թիվ մեկ պատասխանատուն իշխանությունն է, և իշխանությունը պետք է քայլեր անի ճգնաժամը լուծելու: Այդ մասին այսօր Ազգային ժողովում լրագրողների հետ զրույցում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը: 

«Ընտրությունների կազմակերպումով՝ իշխանությունը որևէ մեկին լավություն չի անում: Ներքաղաքական ճգնաժամի թիվ մեկ պատասխանատուն իշխանությունն է, և իշխանությունը պետք է քայլեր անի ճգնաժամը լուծելու: Մենք ենք ընդառաջել, որ լինեն ընտրություններ, եթե դա անընդհատ շահարկվի, թե՝ եթե ընդդիմությունը թեկնածու առաջադրի, Փաշինյանը կընտրվի վարչապետ, կարծում եմ՝ անլուրջ է»,- ասաց Մարուքյանը: 

Նա նկատեց, որ, իշխանությունը կարող է Փաշինյանին ընտրել վարչապետ, բայց դա չի լուծի ճգնաժամը և տեղի կունենա այն, ինչ շարունակաբար տեղի է ունենում մի քանի ամիս:

«Ինչպես տեսաք, այս փուլում մենք հնարավորություն ունեինք առաջադրում անելու, բայց չենք արել, որովհետև եթե մի բան պայմանավորվում ենք ժողովրդի հետ, ժողովրդին խոսք ենք տալիս, որ մենք ընտրությունների համար անում ենք սա, ուրեմն անում ենք դա: Պայմանավորվածությունը ոչ թե Փաշինյանի հետ է, այլ ժողովրդի, ժողովրդին ենք խոսք տվել, որ էս խորհրդարանը պետք է արձակենք, որ, ժողովուրդ, դու նորից ընտրես»,- ասաց պատգամավորը: