«Ուզում ենք տնտեսությունը զարգանա՞, թե՞ ոչ». Քերոբյանը զարգացումը պատկերացնում է կրճատումներով. բողոքի ակցիա՝ Կառավարության դիմաց (տեսանյութ)

Գործազուրկների թիվը կհամալրվի ևս 69-ով: Էկոնոմիկայի նախարար Վահան Քերոբյանը որոշել է, որ Էկոնոմիկայի նախարարության գյուղատնտեսության խորհրդատվության նորարությունների և մոնիտորինգի վարչության մարզային բաժինների հաստիքներ հարկավոր չեն և կրճատել է աշխատողներին:

Վերջիններս եկել էին կառավարություն՝ իրենց դժգոհությունները հայտնելու նախարարությանն ու վարչապետին:

Թեև աշխատակիցները վստահեցնում են բացատրում, որ գյուղացիներն իրենց աշխատանքի կարիքն ունեն, սակայն նախարարն ավելի քան վստահ է՝ այդ հաստիքները ավելորդ էին և պետությանը ֆինանսական օգուտ չէին տալիս:

Նկատենք, որ վարչության բաժիններում տալիս են խորհրդատվություններ կապված՝ բույսերի ու անասունների բուժման և այլ պրոֆիլակտիկ աշխատանքների հետ:

Գյուղացիների հետ աշխատող մասնագետները վստահ են, որ միտում կա թուրքական շուկա մտնելու և իրենց կառույցը ուզում են լուծարել:

Այդպես է, թե ոչ՝ նախարար Քերոբյանը հստակ չպատասխանեց, բայց նշեց, որ տնտեսության զարգացմանն ուղղված ցանկացած քայլ բերելու է աշխատատեղերի կրճատման:

«Հիմա մենք ուզում ենք տնտեսությունը զարգանա", թե՞ ոչ»,-ասաց Քերոբյանը: Նա նաև նկատեց, որ ամեն ինչ պետք է օնլայն կազմակերպել:

«Բոլորը սմաթֆոն ունեն, ո՞վ չունի սմաթֆոն, իրենք օպերատորի աշխատանք են կատարում»,-ասաց նա:

Նախարարը նկատեց, որ շատ այլ աշխատատեղեր կան նշված մարզերում և կարող են աշխատանք գտնել, իսկ այդ մարդկանց աշխատանքերը կիրականացվեն օնլայն՝ այլ մասնագետների կողմից: 

Երբ քաղաքացիները նկատեցին, որ աշխատատեղեր չկան մարզերում, Քերոբյանը չհամաձայնեց: Ըստ նրա՝ աշխատանք գտնելը շատ հեշտ է՝ ինքն ունի ընկերներ, ովքեր ասել են իրեն այդ մասին:

«Ձեր ընկեները բիզնեսմեններ են»,-նկատեցին գյուղացիները:

«Ո՛չ, հասարակ գյուղացիներ են»,-ասաց Քերոբյանը, ինչին ի պատասխան՝ հավաքվածները հեգնեցին՝ «լավ էլի»...

Նախարարը նաև նկատեց, որ այս որոշումը դեռ դեկտեմբերից է եղել, բայց ուշացավ իրականացնելը:

Այլ կերպ ասած՝ նրա հանդիպումը ակցիայի մասնակիցների հետ անարդյունք էր: 

Վերջիններս որոշեցին դիմել նաև վարչապետին ու չհեռանալ Էկոնոմիկայի նախարարության մոտից՝ մինչև հարցը չլուծվի:

Մանրամասները՝ տեսանյութում․