Պատգամավո՞րն է որոշում՝ ում, երբ ստորացնել․ այս նախագիծը լինելու է մահակ՝ անցանկալի մարդկանց չեզոքացնելու համար․ Թագուհի Թովմասյան

Բերված նախագիծը լավն է, փաթեթավորումը գեղեցիկ է, բայց բովանդակությունը խնդրահարույց է։ Այսօր Ազգային ժողովում լրագրողների հետ զրույցում ասաց անկախ պատգամավոր Թագուհի Թովմասյանը՝ անդրադառնալով Հայաստանի Հանրապետության քրեական օրենսգրքում փոփոխություններ և լրացումներ կատարելու մասին և կից ներկայացված նախագծերի փաթեթին, որը խորհրդարան էր բերվել քննարկման։

Պատգամավորի դիտարկմամբ, նախագիծը քննարկելիս իշխանության ներկայացուցիչները խիստ ագրեսիվ էին, և դա նաև մասամբ կապված է Սյունիքի դեպքերի հետ։ Նա նկատում է, որ եթե հիմա այս փաթեթը քննարկվի ու ընդունվի, ապա կստացվի, որ ամեն մի նմանատիպ դեպքից հետո  նոր նախագիծ է բերվելու։

«Այսինքն՝ կյանքի ամեն դրվագ նոր օրենքով պետք է դատապարտվի։ Իմ կարծիքով, այսօրվա այս իրավիճակի սերմերը ցանել է սև ու սպիտակ բաժանումների հեղինակը։ Եվ ըստ իս, այս ընտրություններն այդ լարվածությունը չեն թոթափելու, մարդկանց նյարդերն ավելի պրկվելու են, և ես կանխատեսում եմ ամենավատ սցենարները՝ հարձակումներ, խոչընդոտման ամենատարբեր ձևեր, ինչն էլ իր հերթին կարող է հանգեցնել մի շարք նոր ձերբակալությունների»,- ասաց Թագուհի Թովմասյանը։

Նա նկատում է, որ այս կերպ ստացվում է, որ ով հայհոյի Փաշինյանին՝ խուլիգան է․ «Այդպես չի կարելի։ ԱԺ պատգամավորն ասում է, որ ինչ-որ մարդիկանց պետք է ստորացնելով բերման ենթարկել, այսինքն՝ մեր երկրում կան քաղաքացիներ, որոնք արժանի են ստորացմա՞ն, և ո՞վ, պատգամավո՞րն է որոշում՝ ում, երբ ստորացնել։ Եվ այս նախագիծն էլ լինելու է մահակ՝ անցանկալի մարդկանց չեզոքացնելու համար»,- նշեց նա։

Ինչ վերաբերվում է քարոզարշավը խոչընդոտելու համար սահմանված 700 հազարից մինչև 1 միլիոն դրամ տուգանքին, ապա պատգամավորի համար հասկանալի չէ, թե ընդհանրապես ինչ են նկատի ունեցել՝ խոչընդոտել ասելով։

«Հայտնի չէ, թե խոչընդոտելը որն է, կարող է հոգոց հանես, ու դա դիտվի խոչընդոտում»,- ասաց Թագուհի Թովմասյանը։ Նրա կարծիքով, իշխանությունն այսօր գնում է ռեպրեսիաների, անընդհատ ինչ-որ բաներ խստացնելու ճանապարհով։