Դո՞ւք եք որոշում՝ ով է խուլիգան, ով՝ ոչ․ սյունեցիների մասին խոսելիս խիստ հարգալից վերաբերմունք դրսևորեք․ Աննա Գրիգորյան

«Ինչ է, դո՞ւք եք որոշում՝ ինչպիսին պետք է լինի սյունեցին»: Այս մասին Ազգային ժողովի ամբիոնից հայտարարեց անկախ պատգամավոր Աննա Գրիգորյանը՝ արձագանքելով իմքայլականների հնչեցրած մեղադրական հայտարարություններին, որոնք ուղղված էին սյունեցիներին։ 

Հիշեցնենք, որ նրանք հայհոյանքներ էին հնչեցրել Նիկոլ Փաշինյանին ուղղված։

Աննա Գրիգորյանը, ով պատերազմյան շրջանում առաջին պատգամավորներից էր, ով  լքեց «Իմ քայլը» խմբակցությունը, նկատեց, որ չի կարելի կանգնել ամբիոնի մոտ ու որակումներ տալ սյունեցիներին։

«Դո՞ւք եք որոշում՝ ով է խուլիգան, ով՝ ոչ։ Զգույշ եղեք մարդկանց մասին խոսելիս»,-ասաց պատգամավորը՝ իր խոսքն ուղղելով իմքայլականներին։

Նա նկատեց, որ խորհրդարանը պետք է ոչ թե բաժանարար լինի, այլ միավորի ժողովրդին, մինչդեռ նրանք իրենց պահվածքով նոր սեպ են խրում ժողովրդի միջև։

«Այս երեք տարիների ընթացքում մենք սևի ու սպիտակի բաժանեցինք մեր հասարակությունը, հիմա էլ այն ներմուծում եք Սյունիքի մարզ՝ ասելով, որ կան լավ սյունեցիներ, որոնք ձեր կողքին են, և շատ վատ սյունեցիներ։ Այդպես խոսողներին ես կխնդրեի, կառաջարկեի գնալ Սյունիք, կանգնել Շուռնուխում և խոսել նման կերպ»,- ասաց Աննա Գրիգորյանը։

Նրա ելույթի ընթացքում իմքայլականները փորձում էին ռեպլիկներ հնչեցնել։ Արձագանելով նրանց՝ Աննա Գրիգորյանը հորդորեց  պատգմավորին վայել պահել իրենց ու չընդհատել իրեն։

Աննա Գրիգորյանը նաև հիշեցրեց իմքայլական, Նիկոլ Փաշինյանի աներձակ Հրաչյա Հակոբյանի խոսքը, թե «Բա պետք ա բերման ենթարկեն, այ տենց ստորացնելով բերման ենթարկեն» և շեշտեց, որ ԱԺ պատգամավորը պարտավոր է պահպանել պատգամավորական էթիկան։

«Ես խնդրել եմ, որ ստեղծվի էթիկայի հանձնաժողով և քննվի այս հարցը։ Եվ ընդհանրապես, սյունեցիների մասին խոսելիս խիստ հարգալից վերաբերմունք դրսևորեք»,- եզրափակեց խոսքը նա։