«Ալիևները նկարվել են Ռազդարա տարածքում, որն այս վերջին շրջանում է հանձնվել Ադրբեջանին․․․ ով համարձակ է, թող գա՝ միասին կգնանք այդ տեղանքը». Շիկահողի գյուղապետ․ 168․am

Պարզվում է, Սյունիքի մարզում իշխանություններն Ադրբեջանին են հանձնել նաև «Սոսիների պուրակը», դրա մասին երեկ բարձրաձայնել էր լրագրող Նարինե Կիրակոսյանը և կից հրապարակել Ալիևների ընտանիքի այցն այնտեղ, որտեղ Ալիևը կնոջ ու դստեր հետ ծառերին գրկախառնված նկարվել էր։

Նարինե Կիրակոսյանը Շրջակա միջավայրի և Պաշտպանության նախարարություններից պահանջել էր, որպեսզի բացատրեն, թե ինչ է նշանակում այդ ամենը։

Ի պատասխան լրագրողի բարձրաձայնած այս խնդրի, Շրջակա միջավայրի նախարարությունը պարզաբանում էր տարածել, որում մասնավորապես նշել էր. «Տարածվող լուսանկարում պատկերված տարածքը «Սոսու պուրակ» պետական արգելավայրի տարածք չէ, այլ Ծավ գետի հովտով շարունակվող, Ադրբեջանի տարածքում գտնվող սոսի ծառատեսակի աճելավայրի շարունակությունն է, որը չի գտնվում ՀՀ տարածքում։

«Սոսու պուրակ» պետական արգելավայրը, որի տարածքը 64,2 հա է, գտնվում է ՀՀ Սյունիքի մարզի Ներքին Հանդ բնակավայրի վարչական տարածքում՝ «Զանգեզուր» կենսոլորտային համալիր» ՊՈԱԿ-ի պահպանության ներքո։

Այնտեղ մինչ պատերազմն իրականացվել են նաև սահմաների երկայնքով հստակ կոորդինատներով սահմանասյուների տեղադրման աշխատանքներ, ինչը սահմանային փոփոխության չի ենթարկվել։

Կից ներկայացնում ենք նաև «Սոսու պուրակ» պետական արգելավայրի առաջին սահմանասյան լուսանկարը, որը մինչ պատերազմն ըստ սահմանային կոորդինատների՝ տեղադրվել էր Հայաստանի Հանրապետության և Ադրբեջանի Հանրապետության սահմանին, և որը սահմանային փոփոխության չի ենթարկվել:

Հորդորում ենք զերծ մնալ ակնհայտ ապատեղեկատվություն տարածելուց և հանրությանը միտումնավոր տեղեկատվական մանիպուլյացիաների ենթարկելուց»,- նշված էր նախարարության տարածած հաղորդագրության մեջ:

168.am-ի հետ զրույցում Սյունիքի մարզի Շիկահող գյուղի գյուղապետ Նարե Ղազարյանն ասաց, որ ծառը, որին Ալիևների ընտանիքը գրկած նկարվել է, գտնվում էր Ռազդարա տարածքում, որն անմիջապես հարակից է «Սոսիների պուրակին»։

«Մեր պատկան մարմինների ասելով՝ այդ պուրակը չի տրվել ադրբեջանցիներին, դե մենք ունենք այն տեղեկատվությունը, որը հայտնի է բոլորիս։ «Սոսիների պուրակը» 60 և ավելի հեկտար տարածք է, որից հետո արդեն ստեղծվել է բնական պուրակ, այսինքն՝ դրա շարունակությունը բնական պուրակն է։ Ալիևները նկարվել են բնական պուրակի տարածքում՝ սոսու ծառի կողքը։ Հստակ հատվածը նշում եմ՝ Ռազդարա տարածքում է, որն այս վերջին շրջանում է հանձնվել Ադրբեջանին։ Դա ներքին Հանդ գյուղից մոտավորապես 2-3 կմ հեռավորության վրա է»,- նշեց Նարե Ղազարյանը։

Նրա խոսքով՝ դեկտեմբերի 25-ին, երբ ադրբեջանական զինուժը տեղակայվեց Սյունիքում, այդ ժամանակ էլ «Սոսիների պուրակն» այլ տարածքների հետ հանձնվեց թշնամուն։

«Իհարկե, այդ ամենից մենք տեղյակ չենք եղել, մեզ առհասարակ որևէ մեկը տեղյակ չի պահել։ Մենք բազմիցս քննարկել ենք այն հարցը, որ հեռացել ենք նաև այն դիրքերից, որոնք մեզ էին պատկանում, սակայն հրամանով հեռացել ենք։

Եթե ասում են, որ պուրակը չեն հանձնել, եթե անգամ չեն հանձնել, այսօրվա նկարը արված է պուրակի հարևանությամբ, 1 մետրի տարբերություն է։

Մեկ բան էլ ասեմ՝ Ադրբեջանում երբեք սոսու ծառ չի եղել, դա եղել է հայկական պատմական ծառ։ Այդ նկարներն իրական են, նույնիսկ ունեն տեսահոլովակ․ այն կետը, որտեղ իրենք են նկարվել՝ Ծավ և Շիկահող գետերի շարունակությունն է, որը խաչմերուկում միանում է իրար ու անցնում Հանդ գյուղի միջով»,- հավելեց Շիկահողի գյուղապետը։

Միաժամանակ Նարե Ղազարյանն ասաց, որ եթե կառավարության որևէ անդամ ասում է, թե պուրակը Հայաստանինն է և չեն հանձնել, կարող են գնալ Սյունիք և իր հետ միասին այցելել «Սոսիների պուրակ»։

Մանրամասները՝ սկզբնաղբյուրում։