ԿԳՄՍ նախարարի միանգամից 3 խորհրդական հապճեպ տեղավորվել է վարչություններում. զգալով գործող կառավարության մոտալուտ վախճանը

Վահրամ Դումանյանի ղեկավարած Կրթության, գիտության, մշակույթի և սպորտի նախարարությունում խլվրտոց է սկսեց, իսկ որ ավելի վատ է՝ հենց նրա շուրջ:

Բանն այն է, որ Դումանյանն, այսպես ասենք, ժառանգել է Արայիկ Հարությունյանի բոլոր  խորհրդականներին: Եվ այժմ, նրա խորհրդականներից 3-ը, հավանաբար զգալով կառավարության մոտալուտ փոփոխությունը, շտապել են տեղավորվել Կրթության նախարարության վարչության պետերի պաշտոններում որպես քաղծառայողներ: 

Հետաքրքրականն այն է, որ վարչության պետերի պաշտոնների համար երկար ժամանակ մրցույթներ չէին հայտարարվում և Փաշինյանի հրաժարականից օրեր առաջ հապճեպ կերպով անցկացվել են այդ մրցույթները, որպեսզի նրանք ամուր տեղավորվեն իրենց աթոռներին: 

Ինչպես հայտնի է, ի տարբերություն քաղծառայողների, խորհրդականները նշանակվում են հայեցողությամբ, այսինքն՝ ենթադրյալ նոր նախարարը ցանկացած պահին կարող է հեռացնել խորհրդականին: 

NEWSPRESS.am-ին հաջողվեց պարզել, որ նրանցից մեկը Երիտասարդական քաղաքականության, լրացուցիչ և շարունակական կրթության վարչության պետ Գոհար Մամիկոնյանն է, ով նախարարության ներսում համարվում է «Արայիկ Հարությունյանի մարդը» հաղթել է մրցույթն ու այժմ զբաղեցնում է վարչության պետի պաշտոնը: 

Թերևս միակ չպարզված հարցը մնում է այն, թե այս երեք անձինք սեփակա՞ն կամքով են տեղափոխվել վարչություններ, թե՞, գործող իշխանությունն արդեն իսկ սկսել է «ներդրումներ» անել գալիք կառավարությունում: