Վերջին ամիսներին իշխանությունների գործողությունները որևէ կերպ չեն մղել քաղաքացիներին ձեռնարկելու նման գործողություններ. Մակունցը՝ Սյունիքի ացիայի մասին

Այն, ինչ տեղի է ունեցել Սյունիքի մարզում, եթե ոմանք այն մեկնաբանում են որպես քաղաքական ակցիա, ես կարծում եմ՝ դրանք ակցիաներ էին՝ ուղեկցված խուլիգանական դրսևորումներով: Այս մասին այսօր Ազգային ժողովում լրագրողների հետ զրույցում ասաց ԱԺ «Իմ քայլը» խմբակցության ղեկավար Լիլիթ Մակունցը:

Հարցին՝ դժգոհելու առիթներ ունեցող մարդիկ չկայի՞ն, ովքեր տուն են կորցրել կամ ապրում են թշնամուց փոքր հեռավորության վրա, Մակունցը պատասխանեց.

«Դժգոհելու առիթ միշտ կա: Դժգոհելու առիթ միշտ լինելու է բոլոր իշխանությունների պարագայում: Այստեղ հարցն այլ է. հարցն այն է, որ կա որոշակի միտում Հայաստանի Հանրապետությունը բաժանելու մասերի և դա նկատվում է նաև առանձին, այո, ուղղորդված խմբակների կողմից, որը չի կարող ընդունելի լինել որևէ երկրի քաղաքական ղեկավարության կողմից և նաև իրավապահ համակարգի»:

Դիտարկմանը, թե ո՞վ է միտումնավոր երկիրը մասերի բաժանել՝ ընդդիմադիրնե՞րը, Մակունցն ասաց, որ անուններ չի կարող հնչեցնել, որովհետև չգիտի, բայց հետևելով իրադարձություններին՝ ունի տպավորություն, որ այդ ամենն ուղղորդված է:

Նա չհամաձայնեց այն տեսակետին, որովհետև իրենց գործողություններով իրենք միտում չեն ունեցել տարանջատելու հասարակությանը:

«Մեր գործողություններով մենք որևէ կերպ չենք փորձել և միտում չենք ունեցել տարանջատելու հասարակությանը: Ընդհակառակը: Եվ դա է պատճառը, որ 2018 թվականի մայիսից եղել են գործողություններ, որոնք միտված են եղել հնարավորություն տալու դաշտում բոլորին դրսևորվելու: Վերջին ամիսներին ՀՀ իշխանությունների գործողությունները որևէ կերպ չեն մղել քաղաքացիներին ձեռնարկելու նման գործողություններ»,- նշեց նա: