Արթուր Բաղդասարյանի միջոցով կձերբակալե՞ն Ժիրայր Սեֆիլյանին

Սահմանադրության հանրաքվեից օրեր առաջ ՕԵԿ նախագահ Արթուր Բաղդասարյանը նորից պոռթկաց, հայտարարելով որ ՕԵԿ-ը խորհրդարանում չի դնի նախագահ Սերժ Սարգսյանի հրաժարականի հարցը: Իհարկե, այս պոռթկումը մեկ տարի առաջ նույն Արթուր Բաղդասարյանի հնչեցրած «հեղափոխական» այն մտքի շարունակությունն էր, որ Սերժ Սարգսյանն իր վեց տարվա ընկերն է և նրա հրաժարականը պահանջելն իր կողմից անբարոյական քայլ կդիտվի: Իսկապես անբարոյական կլինի, քանի որ նույն Բաղդասարյանի խոստովանությամբ, այս երկրում իր աշխատանքը կախված է մեկ մարդուց` նախագահ Սերժ Սարգսյանից: Ահա թե ինչու նույն ՕԵԿ-ը սահմանադրության հանրաքվեին դեմ լինելով` կողմ գնաց, նույնիսկ ՕԵԿ-ական որոշ հանձնաժողովականներ հայտնվեցին հանցագործ ընտրակեղծարարների շարքում, մասնավորապես, 5/16 տեղամասի ՕԵԿ-ական նախագահ Կարինե Մեհրաբյանը: Իսկ Արթուր Բաղդասարյանի «սիրելի» տիկին Բիշարյանը այս ընտրություններից հետո էլ սովորության համաձայն Հռոմի պապից ավելի կաթոլիկ կեցվածք ընդունեց: Սահմանադրությունից անմիջապես հետո խորհրդարանի ամբիոնից ՕԵԿ-ական տիկինը մտահոգոթյուն հայտնեց, որ գյուղական համայնքներում Սահմանադրության հանրաքվեն անցավ բդեշխական կարգով: Ստացվում է, որ անատոմիական տեսանկյունից ՕԵԿ-ը կիսահղի վիճակում է ու անդադար երկունքի ցավի մեջ, իսկ դասական քաղաքագիտության առումով ՕԵԿ-ի դեպքը եզակի է. կուսակցություն, որն հասցրել է ռեկորդակիր լինել` երեք անգամ զբաղեցրել է ընդդիմադիր դաշտը` դրա դիմաց ստանալով տարբեր պաշտոններ:

Ու մինչ ՕԵԿ-ը երկունքի ցավ է ապրում, ԱԲ-ն, նախկին ԱԽՔ-ը, քաղաքական ինքնահրկիզման ճանապարհով ասպարեզ բերեց մի նոր զավակի `«Հայկական վերածնունդ» անվանումով: Ավելին, ըստ օդում կախված լուրերի, մինչև տարեվերջ ժամանակ է տրված, որպեսզի Բաղդասարյան –Բիշարյան զույգը իրենց բիզնես–ընտրակեղծարար համախոհներին օծեն ու նրանց բոլորի վրայից մաքրեն ՕԵԿ անունը և մաքրազերծված վերածնվեն արդեն վերածնունդում, որի միջոցով էլ հույս կա հարթել Բաղդասարյանի քաղաքական արդեն վերածնված ճանապարհը:

Բայց այստեղ էլ հարթելու շատ գործ կա, քանի որ քաղաքական դնթ-ի արդյունքում պարզվում է, որ այս «Հայկական վերածնունդը» ապօրինի զավակ է, և Բաղդասարյանը գողացել է 11 երկրներում ձևավորված հայկական վերածնունդ շարժումն ու փորձում է սեփականացնել: Այնինչ սփյուռքում գործող այս շարժումն, ըստ որոշ լուրերի, սատարում է Հայաստանում Ժիրայր Սեֆիլյանի ստեղծած «Հիմնադիր խորհրդարանին»:

Եվ արդյո՞ք պատահական զուգադիպություն էր, որ այս օրերին միաժամանակ շրջանառության մեջ դրվեց երկու թեզ ` նախ որ Ժիրայր Սեֆիլյանին շուտով ձերբակալելու են, իսկ Արթուր Բաղդասարյանը Սերժ Սարգսյանի ձեռամբ կլինի հաջորդ նախագահը: Ժամանակին Պարույր Հայրիկյանը նախագահի և թեկնածուի ազդեցության տակ քավության նոխազ դարձրեց էպոսագետ ու նախագահի թեկնածու Վարդան Սեդրակյանին, ով դատապարտվեց 14 տարվա ազատազրկման:

Դրվագը կրկնվում է հերոսների փոփոխությամբ և մի տարբերությանբ, որ լարախաղացն ավելի ճկուն է, բազմափորձ, և մարդ, ով այլևս կորցնելու ոչինչ չունի: Իսկ սարսափելին նա է, ով կորցնելու ոչինչ չունի:

Ուրեմն առաջ մինչև նախագահ: