Գլխավոր դատախազությունը «աբստրակտ» բնույթի հաղորդումներ է ստացել

ՀՀ դատախազությունը մինչև այս պահի դրությամբ տվյալներ է ստանում դեկտեմբերի 6-ի հանրաքվեի ժամանակ տեղի ունեցած ընտրախախտումների մասին:

ՀՀ գլխավոր դատախազ Գեւորգ Կոստանյանն այդ մասին հայտնեց լրագրողների հետ հանդիպման ժամանակ:
«Ակախ նրանից ստացված նյութերն իրենց մեջ պարունակում էին հանցագործության մասին հաղորդում, թե ոչ, բավարար էին կամ ոչ, ուղղվել են, բաշխվել են ոստիկանության, Քննչական կոմիտեի, Հատուկ Քննչական ծառայության քննիչների միջև՝ ընթացքն ապահովելու համար»,- ասաց գլխավոր դատախազը՝ հավելելով, որ հաճախ հաղորդումները ստացվել են «աբստրակտ» բնույթի` առանց նշելու որեւէ իդենտիֆիակացման ենթակա հանգամանք` տարածք, վայր, անձ, ժամանակ, որը ստուգելու համար, նրա խոսքով, ժամանակ է անհրաժեշտ:

Հանրաքվեի ժամանակ արձանագրված խախտումների ընդհանուր թիվը, գլխավոր դատախազի փոխանցմամբ, 461-ն է, որոնցից 143-ով նախապատրաստվել են նյութեր, դրանցից 12-ն ուղարկվել են ոստիկանության տարբեր ստորաբաժանումներ՝ ստուգման նպատակով, 214-ով հարուցվել են քրեական գործեր, 189 ահազանգի վերաբերյալ կայացվել է որոշում՝ քրեական գործի հարուցումը մերժելու մասին:

Գևորգ Կոստանյանն ասաց, որ ստացված խախտումներից 82-ը ներկայացվել են քաղաքացիների կողմից, 55-ը իրավապաշտպան կազմակերպությունների, ՀԿ-ների կողմից, իսկ 30-ը՝ դիտորդների: Մնացած 300-ը կազմվել են գլխավոր դատախազության կողմից՝ տարբեր կայքերից հանված նյութերի առնչությամբ:

«Սա վերջնական պատկերը չէ, այս րոպեի պատկերն է: 15 րոպե հետո կարող ենք ունենալ տրամագծորեն այլ պատկեր որովհետև հաղորդումները դեռևս շարունակվում են, կայացվում են որոշումներ՝ քրեական գործ մերժելու կամ հարուցելու մասին»,- ասաց Կոստանյանը: