Ադրբեջանը պետք է վերադարձնի Արցախից ու Հայաստանից ղեկավարության թողտվությամբ յուրացրած տարածքները. «Որդուս» ՀԿ

«Որդուս» ՀԿ-ին անդամագրված մայրերը տարածել են ուղերձ, որտեղ ասված է.

«Մենք՝ 2021թ. ապրիլի 17-ին տեղի ունեցած մայրերի հավաքի ներքոստորագրյալ մասնակիցներս,

. Թուրքիայի ամենագործուն աջակցությամբ Ադրբեջանի կողմից 2020թ. սեպտեմբերի 27-ին սանձազերծված 44-օրյա պատերազմը համարելով հայության դեմ ցեղասպանության քաղաքականության շարունակություն՝

խստագույնս դատապարտում ենք Հայաստանի Հանրապետության գործող քաղաքական ղեկավարությանը՝ այս պատերազմը չկանխելու և չարամտորեն այն տանուլ տալու հարցում։

. Դատապարտելով միջազգային հանրության ցուցաբերած անտարբերությունը թուրք-ադրբեջանա-ահաբեկչական դաշինքի սանձազերծած պատերազմին համարժեք արձագանք չտալու հարցում,

. վկայակոչելով Ադրբեջանի ղեկավարության կողմից Հայաստանի Հանրապետության ինքնիշխան տարածքների նկատմամբ բացահայտ հավակնություն դրսևորելու, հայության հանդեպ պետական մակարդակով շարունակվող ատելության հանգամանքները,

. վկայակոչելով միջազգային իրավունքի նորմերի կոպիտ խախտմամբ հայ ռազմագերիներին չվերադարձնելու, նրանց արհեստականորեն ռազմական հանցագործներ համարելու և ապօրինաբար անազատության մեջ պահելու, խոշտանգելու և ստորացնելու փաստերը,

. Թուրքիայի և Ադրբեջանի վարքագիծը համարելով Հայաստանի նկատմամբ գոյութենական սպառնալիքի դրսևորման քաղաքականություն՝

.հայտարարում ենք, որ Արցախի հիմնահարցը լուծված չէ. Ադրբեջանը պետք է վերադարձնի Արցախի Հանրապետությունից բռնազավթած և Հայաստանի Հանրապետությունից վերջինիս ղեկավարության թողտվությամբ յուրացրած տարածքները:

. Անթույլատրելի ենք համարում Ադրբեջանի հետ կոմունիկացիաները բացելու քաղաքական ուղեգիծը, քանի դեռ Արցախի հիմնահարցը չի ստացել իր արդարացի լուծումը՝ ազգերի ինքնորոշման իրավունքի սկզբունքի համատեքստում:

. Ադրբեջանի հետ կոմունիկացիաների բացելու, առևտուր անելու, Թուրքիայի հետ հաշտվելու այս պարտվողական օրակարգը, որ սահմանում է ՀՀ գործող քաղաքական ղեկավարությունը՝ կեղծ թեզերով մոլորեցնելով ՀՀ ազգաբնակչությանը, համարում ենք չափազանց վտանգավոր՝ նկատի ունենալով Սիրիայում, Իրաքում, Աջարիայում Թուրքիայի ռազմաքաղաքական և տնտեսական էքսպանսիայի օրինակները և Հայաստանի գլխին ծառացած վտանգը՝ Թուրքիայի ղեկավարության բացահայտ նեոպանթյուրքիստական արտաքին քաղաքականության համատեքստում:

. Հայտարարում ենք, որ Թուրքիայի հետ հաշտեցումը կարող է տեղի ունենալ միայն Հայաստանի հզորացման, իր ուժերով սեփական կենսական շահերը պաշտպանելու հնարավորության վերականգնման պարագայում, ինչպես նաև այն դեպքում, երբ Թուրքիայի ղեկավարությունը մի օր անկեղծ զղջում կարտահայտի հայությանը հայրենազրկելու,որպես էթնոմշակութային տեսակ և որպես քաղաքական գործոն վերացնելու՝ մոտ մեկուկես հարյուրամյակ առաջվանից մեկնարկած և մինչ օրս շարունակվող քաղաքականության կապակցությամբ ու կդադարեցնի այն»։