Վերահսկիչ պալատը քաղաքաշինության ոլորտում կրկին խախտումներ է հայտնաբերել

Վերահսկիչ Պալատը ներկայացրել է 2014 թվականի գործունեության ծրագիրը, որտեղ նշվում է, որ Հայաստանի քաղաքաշինության ոլորտում Վերահսկիչ պալատը հայտնաբերել է անորակ շինաշխատանքներ, նախագծային և շինարարական նյութերի փորձաքննության անկատարություն, ինչի արդյունքում տուժել է շինարարության որակը, իսկ գումարները արդյունավետ չեն ծախսվել:
2014-ին վերահսկողություն է իրականացվել Աբովյանի, Գավառի բժշկական կենտրոնների, Ալավերդու բժշկական կենտրոնի պոլիկլինիկական մասնաշենքերի, «Էրեբունի բժշկական քոլեջ» ՊՈԱԿ-ին պատկանող 2-րդ մասնաշենքի վերակառուցման, Կոտայքի և Շիրակի մարզպետարանների կողմից իրականացված շինարարության նկատմամբ և պարզվել է, որ շինարարական աշխատանքների որակի, նախագծերի մշակման, դրանց փորձաքննության, տեխնիկական և հեղինակային հսկողության հետ կապված արձանագրված խնդիրները կրկնվում են գրեթե բոլոր վերահսկվող օբյեկտներում:

Ըստ ծրագրի, Կոտայքի մարզում 2014-ին արձանագրվել է, որ թվով 18 դպրոցի վերանորոգման աշխատանքները տարիներ շարունակ չեն ավարտվում։ Ավելին, հստակեցված չեն պայմանագրերով նախատեսված աշխատանքների կատարման վերջնաժամկետները։

Ընդհանուր առմամբ, 49 օբյեկտի նախագծային աշխատանքներն իրականացվել են ոչ պատշաճ մակարդակով, ինչը հանգեցնում է աշխատանքների ընթացքում ծավալների էական փոփոխությունների։

Շինարարության ոլորտում իրականացված վերահսկողության արդյունքները թեև վկայում են, որ այլևս չկան ծավալային հավելագրումներ, այդուհանդերձ, դեռևս առկա են լրջագույն խնդիրներ: