Դատարանը փորձում է ապահովել Պերմյակովի անվտանգությունը

«Ավետիսյանների սպանության գործով դատական նիստը չի կայանա Շիրակի մարզի առաջին ատյանի դատարանի Գյումրու նստավայրում՝ Պերմյակովի անվտանգությունը ապահովելու համար»:

Լրագրողների հետ հանդիպման ժամանակ հայտարարեց Շիրակի մարզի ընդհանուր իրավասության առաջին ատյանի դատարանի նախագահ Գագիկ Հովհաննիսյանը:

Հիշեցնենք, որ առաջիկա դատական նիստը կայանալու է դեկտեմբերի 18-ին 102-րդ ռազմաբազայի տարածքում:

Նկատենք, որ Պերմյակովի նախորդ դատավարության ժամանանակ լուսաբանումն ազատ չի եղել: Մասնավորապես, լրագրողների ձեռքից վերցվել է բջջային հեռախոսները, շարժական համակարգիչները, որի պատճառով հնարավոր չի եղել ապահովել հրատապ լրատվությունը, իսկ դատարանի դահլիճից դուրս գալուց հետո մուտքը փակվել է: Գագիկ Հովհաննիսյանը վստահեցրեց, որ այս անգամ, դատական նիստի լուսաբանման ժամանակ նման խնդիրներ չեն առաջանա:

«Լուսաբանումը կկազմակերպվի այնպես, որ չեք զգալու, թե ռազմաբազայի տարածքում եք: Առաջին շարքում կլինեն մեր աշխատակիցները, որոնք կապահովեն կարգապահություն, իսկ երկրորդ շարքից սկսած՝լրատվամիջոցները»,-շարունակեց Գագիկ Հովհաննիսյանը:

Դատավարությունն ընթանալու է բացառապես հայերենով: Պերմյակովի համար օրենքով սահմանված կարգով կլինի նաև ռուսերեն թարգմանություն:

Նախատեսվում է դահլիճի դիմաց տեղադրել վրան, որտեղ հնարավորություն կընձեռվի ուղիղ կապով հետեւել դատավարության ընթացքին:

Հարկ է նկատել նաև, որ լուսաբանման համար հավատարմագրումը պարտադիր չէ: Լրագրողները կարող են մտնել ռազմաբազայի տարածք անձնագրով եւ ԶԼՄ վկայականով: Այս մասին խոստացավ վերջնական պարզաբանում տալ երկուշաբթի: Սակայն լրագրողները թերահավատորեն մոտեցան, այն հանգամանքին, որ հնարավոր է առանց հավատարմագրման լուսաբանել դատավարությունը:
Թեև այս մասին Գագիկ Հովհաննիսյանը խոստացավ լրացուցիչ տեղեկատվություն տալ երկուշաբթի: