Ռուսաստանը հետ է ուղարկում թուրք ուսանողներին

Թուրքիայի կրթության և գիտության նախարարությունը լուր է տարածել, ըստ որի` ռուսական իշխանությունները հետ են ուղարկում Ռուսաստանում սովորող թուրք ուսանողներին: Այս մասին հաղորդում է թուրքական sondakika.com կայքը:

Վերջին շրջանում հայտնի պատճառներով ստեղծված ռուս-թուրքական հարաբերությունների լարված պայմաններում թվով 1030 թուրք ուսանողներ հայտնվել են ուսումը կիսատ թողնելու դժվար պայմաններում: Թուրքիայի կրթության նախարարության բարձրագույն կրթության վարչության տարածած տեղեկության համաձայն` թուրք ուսանողները տարբեր դժվարությունների պատճառով ստիպված են կիսատ թողնել իրենց ուսումը Ռուսաստանում: Ռուսական ոստիկանությունը սկսել է ստուգումներ անցկացնել թուրք ուսանողների շրջանում և վիզային խնդիրներ ստեղծել: Ըստ կանոնակարգի` վիզայի երկարացման համար թուրք ուսանողները պիտի ներկայացնեն վարձի վճարման անդորագիրը և համալսարանի հետ երկարացված պայմանագիրը, սակայն համալսարանները պայմանագրերը չեն երկարացնում, ինչի պատճառով թուրք ուսանողների վիզաները չեն երկարացվում: Անգամ ռուս դասախոսները չեն ցանկանում դաս անցկացնել թուրք ուսանողների հետ: Բացի դրանից, դժվարություններ են առաջացել նաև հանրակացարանների հետ կապված, և թուրք ուսանողներին դուրս են հանում հանրակացարաններից:

Թուրքիայի միջազգային կրթական խորհրդի նախագահ Նիհաթ Բուղրա Աղաօղլուն հայտարարել է, որ նման ռազմաքաղաքական լարված պայմաններում թուրք ուսանողները Ռուսաստանում չունեն կյանքի և գույքի անվտանգության ապահովվածություն: