Օնիկ Գասպարյանը պատերազմի 4-րդ օրը չի առաջարկել դադարեցնել պատերազմը, դա արձանագրված է ձայնագրությամբ. Նիկոլ Փաշինյան (տեսանյութ)

ՀՀ ԳՇ նախկին պետ Օնիկ Գասպարյանը չի ասել, որ 2-3 օրվա ընթացքում անհրաժեշտ է միջոցներ ձեռնարկել պատերազմը կանգնեցնելու համար: Այսօր՝ ապրիլի 14-ին, Ազգային ժողովի ամբիոնից ասաց ՀՀ վարչապետ Նիկոլ Փաշինյանը:

Նա նշեց, որ այս ընթացքում ունեցել ենք թյուրըմբռումներ, ոմանք՝ հատուկ պլանավորված, ոմանք՝ ակամա և ոչ դիտավորյալ: 

Փաշինյանի խոսքով՝ ճիշտ չէ այն լուրը, որ Օնիկ Գասպարյանը պատերազմի 4-րդ օրը ներկայացրել է կորուստները և ասել, որ «2-3 օրվա ընթացքում անհրաժեշտ է միջոցներ ձեռնարկել պատերազմը կանգնեցենելու համար»:

Հիշեցնենք, որ նոյեմբերի 17-ին Օնիկ Գասպարյանը հայտարարել է, որ պատերազմի չորրորդ օրը ԱԽ նիստի ժամանակ ներկայացրել է մեր կորուստները և ստեղծված իրադրության վերաբերյալ ԶՈՒ գնահատականը՝ նշելով, որ երկու-երեք օրվա ընթացքում անհրաժեշտ է միջոցներ ձեռնարկել պատերազմը կանգնեցնելու համար:

Այժմ Փաշինյանը հակադարձում է.

«Պաշտոնապես ուզում եմ արձանագրել, որ Օնիկ Գասպարյանի հայտարարության այդ կետն իրականության հետ որևէ աղերս և առնչություն չունի: Չի ասել նման բան, դա արձանագրված է պաշտոնապես, այդ թվում՝ ձայնագրությամբ: Ընդհակառակը, սեպտեմբերի 30-ի Անվտանգության խորհրդի նիստում ասել է, որ հակառակորդը ոչ մի առաջխաղացում չի ունեցել, բանակը, ԶՈւ-ն կատարում են իրենց առջև դրված խնդիրը և մինչև վերջ կկատարեն»,- ասաց Փաշինյանը:

Նրա գնահատմամբ՝ Օնիկ Գասպարյանը սեպտեմբերի 30-ին չէր էլ կարող նման հայտարարություն անել, որովհետև 2020թ. օգոստոսի 21-ին Անվտագության խորհրդի նիստում հավաստիացրել է, որ արցախյան ուղղությամբ մենք կարող ենք առկա ուժերով ու միջոցներով «ոչ մի քայլ հետ» սկզբունքով հետ մղել, ձախողել հակառակորդի հարձակումը և ջախջախել նրա խմբավորումները: