Ձեզ թվում է, որ այստեղ հայոց լեզվով Ալիևին շանտուր եք տալիս, ինչ-որ ազդեցություն ունի՞ աշխարհի վրա. ո՞ւր է մեր ԱԳՆ հայտարարությունը. Մարուքյանը՝ Բաքվի «պուրակի» մասին

Երեկ հայկական ամբողջ սոցցանցերը, մամուլը ողողված էին Ադրբեջանի ռազմական հանցագործ իշխանության նկարներով, հայտարարություններով էդ «պուրակի» հետ կապված: Այսօր Հայաստանի խորհրդարանի նիստը բացվեց այդ պահվածքը դատապարտող ելույթներով: Այդ մասին այսօր Ազգային ժողովում հայտարարեց «Լուսավոր Հայաստան» խմբակցության ղեկավար Էդմոն Մարուքյանը:

«Մեզ ի՞նչ ա թվում, որ մենք մեր խորհրդարանում դատափետող ելույթներ ենք ունենում, դա մեծ ազդեցությո՞ւն է ունենում Ադրբեջանի վրա: Նայելու են ու ասեն՝ մի հատ «պուրակ» բացեցինք, ամբողջ երկրով խառնվել են իրար: Իսկ ի՞նչ ենք անում, որ էդ «պուրակները» չբացվեն: Ձեր էսօրվա հայտարարություններն ու վերջին երկու ամսվա հայտարարությունները իրար հետ բռնո՞ւմ են: Չե՛ն բռնում: Ո՞ւր է մեր ԱԳՆ հայտարարությունը: Ձեզ թվում է, որ այստեղ հայոց լեզվով Ալիևին շանտուր եք տալիս, դա ինչ-որ ազդեցություն ունի՞ աշխարհի վրա: Աշխարհը նստած հետևում է մեր պառլամենտի նիստն ու խնդրել է սինխրոն թարգմանե՞ն, որ մեր էս ելույթները լսի՞: Բա միջազգային դիվանագիտական աշխատանքն ո՞ւր է, բա պետք է գործ արվի: Բա պետք է ամբողջ աշխարհը տեսնի, որ ինչ այլանդակ ղեկավարության հետ գործ ունի Հարավային կովկասի տարաշրջանը, ինչ արհավիրք է թուրք-ադրբեջանական տանդեմը: Բա պետք ա աշխատանք տարվի: Խորհրդարանի, մեր հանձնաժողովի կամ մեր ֆեյսբուքում հայերեն շանտուր տալը բա՞ն ա փոխել»,- ասաց Մարուքյանը:

Նա հիշեցրեց, որ 2016 թվականից հետո Ապրիլյան քառօրյայից հետո իրենք գնացել են Արցախ՝ պատգամավորական փոքր խմբով և փաստահավաք առաքելություն իրականացրել, փաստեր ներակայացրել գլխատումների մասին և այլն:

«Դրանից հետո բոլոր հանդիպումներում լոբբինգ էինք անում, որ ԱԳՆ-ն աշխատի, էս փաստերը ցույց տա, որ ունենք գործ Ադրբեջանի՝ Իսլամական պետություն ահաբեկչական կազմակերպության վարք ունեցող պետության հետ: Քանի որ էդ գործը չարվեց, 2020 թվականին դա կատարվեց ավելի մեծ: Հիմա, եթե նորից չարվի, էլի է կրկնվելու: Պետք է գործ անել և ոչ թե հայոց լեզվով ամբիոններից խոսել, սա բան չի փոխում, ամբողջ աշխարհում մայրաքաղաքները մեր դիվանագետների պետք ա նոտաներ ստանային՝ նկարներով, ամեն ինչով»,- ասաց Մարուքյանը: