Առողջապահության նախարարը հերքեց Փաշինյանին ու փորձեց տակից դուրս գալ

Իմաստուն խոսք կա՝ ասում են մի խելառ ծովը ջուր է գցում, 100 իմաստուն չեն կարողանում հանել։ Հիմա այդպես է վարչապետ Նիկոլ Փաշինյանի հայտարարություններից հետո։

Չքննարկելով բազում Փաշինյանի հայտարարություններ, որոնք անելուց հետո կառավարության աշխատակիցները լծվում են դրանց տակից դուրս գալու գործին անդրադառնանք երեկ՝ ապրիլի 7-ին ՌԴ նախագահի հետ հանդիպման ժամանակ արված հայտարարությանը։

Դեռ նոր մարսած «Իսկանդեր»-ի կրակել-չկրակելու մասին արված հայտարարությունը, այժմ էլ կորոնավիրուսի «Սպտուտնիկ V» պատվաստանյութի հետ կապված բլթոցն են սկսել նոր ձևակերպումներով բացատրել, որպեսզի այն արդարացվի։

Թեև ՌԴ նախագահի պարզ հարցին տրվեց պարզ պատասխան, սակայն այժմ առողջապահության նախարարը, Փաշինյանին արդարացնելու համար, փորձում է համոզել, որ ինչ-որ բան ճիշտ չենք հասկացել։

Պուտինը հարցրել է- Регистрация произошла у Вас уже? (Արդեն գրանցվե՞լ է Ձեզ մոտ)

Փաշինյանը արձագանքել է.- Да, да. (Այո, այո)

Այժմ նախարար Անահիտ Ավանեսյանն ասում է, թե «Սպտուտնիկ V» պատվաստանյութը թույլտվություն կա, բայց այն Հայաստանում գրանցված չէ։

Այդ մասին նա լրագրողների հետ զրույցում ասաց կառավարության նիստից հետո, լրագրողների հետո։

«Այս պահին պատվաստանյութերի գրանցում չի իրականացվում, քանի որ դրանք երրորդ փուլի մեջ են, բայց դրանց օգտագործման լայն թույլտվություն, այո՛, տրված է։ Օրենքն ունի մի քանի մեխանիզմ, դրանցից մեկն էլ արտակարգ իրավիճակներում պատվաստանյութն օգտագործելու թույլտվություն տալն է։ Եվ այդ թույլտվությունը տրված է»,- ասաց նախարարը։

Նա նշեց, որ բոլոր պատվաստանյութերն էլ, որոնք կավարտեն կլինիկական հետազոտության երրորդ փուլը, կարող են նաև գրանցվել։