Տիգրան Ավինյա՞նն է իրականում գնել «Բիլայն»-ը

2020 թվականի սարսափելի պատերազմի թեժ պահին՝ հոկտեմբերի 29-ին, «Թիմ Տելեկոմ Արմենիա» ընկերության մամուլի ծառայությունն «աչքալուսանք» տվեց հայ ընթերցողին՝ «Թիմ Տելեկոմ Արմենիա» ընկերությունը հոկտեմբերի 29-ին ձեռք է բերել Veon Armenia-ի 100 տոկոս բաժնետոմսերը: 

Թվում է՝ տարօրինակ ոչինչ չկա. «Յուքում»-ից խռոված-հեռացած Հայկ և Ալեքսանդր Եսայանները սկսում են սեփական բիզնեսով զբաղվել: 

Բայց, NEWSPRESS.am-ի տեղեկություններով, ամեն ինչ այդքան էլ այդպես չէ: Գործարքում գլխավոր փայատերն այս կառավարության «գորշ կարդինալն» է՝ փոխվարչապետ Տիգրան Ավինյանը: Այս տեղեկությունը հերքել է Հայկ Եսայանը՝ պնդելով, թե միայն ինքն ու իր եղբայրն են փայատեր. «Շատ բարձրաստիճան և ընդհանրապես ինչ-որ աստիճան ունեցող ոչ մի պաշտոնյա «Բիլայնում» բաժնետեր չէ։ Ինչպես և նշեցի, «Բիլայնում» միայն բաժնետեր է «Թիմ» ընկերությունը՝ 100 % բաժեմասով, իսկ «Թիմ» ընկերության բաժնետերեր են Եսայան եղբայրները՝ Ալեքսանդր Եսայանը և Հայկ Եսայանը»,- ասել է նա։ 

Ներկայացնենք, սակայն, 1-2 նկատառում այս գործարքի վերաբերյալ, որոնք գալիս են հերքելու Եսայանի այս պնդումը։  

Ժամանակին, երբ ռուսները ձեռք բերեցին «Արմենթելը», վճարեցին շուրջ 450 մլն դոլար: Այժմ, «Թիմ Տելեկոմ Արմենիա»-ի և Veon Armenia-ի գործարքը, մեր տեղեկություններով, կայացել է շուրջ 50 մլն դոլարով, ինչն արդեն իսկ տարօրինակ էժան է՝ հաշվի առնելով այն հանգամանքը, որ այս օպերատորին է պատկանում նաև քաղաքային ցանցը:  

Ինչպես նախկին ընդդիմադիր Փաշինյանը կասեր՝ օդում կախված լուրերի համաձայն՝ Ավինյանը զանգեր է կատարել Միացյալ նահանգներ, գտել բջջային կապի մասնագետների, կապեր հաստատել, որպեսզի այնտեղից գան՝ նոր պայմանագրեր կնքեն «Բիլայն»-ի հետ, որպեսզի այն հզորանալու հաշվին, շուկան, ժամանակակից բառապաշարով ասած, «վերցնի»:

Ստացվում է՝ Ավինյանը պաշտոնավարման ընթացքում կարողացել է այնքան փող կուտակել, որ կարողացել է նման մեծ գործարք իրականացնել, իսկ Եսայան եղբայրներն ընդամենը դրածո են, հնարավոր է՝ փոքր բաժնեմասերով: 

NEWSPRESS.am