Էջմիածնի ավագանու մեջ խելքը գլխին մեկը չկա՞ր, որ ասեր՝ էս ի՞նչ եք անում, սրա իմաստը ո՞րն է․ ինչպես լվանալ փողերը

«Էջմիածինը պետք է փոխի դիմագիծը». այս ամպագորգոռ կարգախոսով քաղաքի շենքերի պատուհաններին ու պատշգամբներին սկսել են փայտեր կպցնել։ Թե ինչու է հենց այս տարբերակը ընտրվել, թերևս կարելի է պատկերացնել․․․ 

Շենքի արտաքին մասի էսթետիկ ձևավորման հեղինակը ավագանու անդամ, նկարիչ-ձևավորող Ներսես Մելիքյանն է․․․

Այս մարդը հավանաբար մեծացել է հին ռուսական ֆիլմերի ներքո և մնացել է ռուսական փայտե տներից ստացած տպավորության տակ․․․

Իհարկե, ոչ ոք չի կարող ասել, որ փայտը, ու առավելևս փայտե գործերը գեղեցիկ չեն, սակայն անզեն աչքով կարելի է նկատել, որ դրանք ամենևին համահունչ չեն այն շենքերին, որոնց վրա, բառիս բուն իմաստով, կցվում են․․․ Ի՞նչ է նշանակում՝ տուֆի վրա փայտ կպցնել, այն էլ՝ անմշակ փայտ․․․

Այնպիսի տպավորություն է, որ ինչ-որ մեկին պետք է եղել սպառել իր վրա մնացած փայտը, ու ավագանին գտել է այն իրացնելու տարբերակը՝ «նաղդել» քաղաքապետարանի վրա ու բյուջեյի հաշվին «սղցնել»․․․

Շինարարները կարող են փաստել, որ գոյություն ունեն էժան, գեղեցիկ ու հարմարավետ այնպիսի շինանյութեր, որոնք թե՛ ոճային, թե՛ դեկորատիվ, ու թե՛ որակական առումներով ավելի մատչելի, ճաշակով և հարմար կլինեին։ Բայց քաղաքապետարանը ընտրել է փողերի լվացման համար ամենահարմար տարբերակը։

Փայտի տեսքը գուցե գեղեցիկ է, բայց ավագանու նիստին մասնակցողների մեջ խելքը գլխին մեկը չկա՞ր, որ ասեր՝ էս ի՞նչ եք անում, սրա իմաստ ո՞րն է․․․

Բացի նրանից, որ փայտի տեսքը ոչ մի կերպ չի արդարացվում տուֆի ֆոնին, այն նաև շատ կարճ կյանք ունի․․․

Նախ պետք է հաշվի առնել, որ այն փակցրել են քանդվող բետոններին։ Այսինքն՝ բետոնն ամրացնելու փոխարեն՝ դրանք քողարկել են փայտով։

Եվ հետո, այս փայտը ամենաշատը 5 տարվա կյանք ունի՝ հաշվի առնելով, որ անձրևից ու արևից այն պետք է քայքայվի ու կորցնի իր տեսքը։

Հետաքրքիր է, թե ավագանու անդամների վառ երևակայությունն այդ ժամանակ մինչև ուր կհասնի և այս անգամ ինչ կմոգոնեն՝ ճաքճքված փայտը քողարկելու համար․․․

Չի քննարկվում նաև այն, որ այս պահին Էջմիածնում առաջնահերթ լուծման համար բազմաթիվ հարցեր կան։

Արմինե Սահակյան