Զոհրաբյանն առաջարկում է բանտ նստեցնել դեղերը կեղծող մաֆիոզներին

Բոլորս գիտենք անուն առ անուն Հայաստանի դեղ ներկրող մաֆիոզներին, հանցագործներին, որոնք պետք է վաղուց բանտ նստած լինեին: Այդ նույն մարդիկ դեղերը կեղծելուց բացի, կեղծում են նաև մանկական սնունդ: Այսօր ԱԺ-ում հրավիրված քննարկման ժամանակ ասաց ԱԺ ԲՀԿ խմբակցության ղեկավար Նաիրա Զոհրաբյանը:

Ըստ նրա, Հայաստան ներկրվում են դեղեր, որոնք արդեն իսկ կեղծված են, որոնց ազդող կոմպոնենտը կամ ընդհանրապես չկա, կամ հակառակ ազդեցությունն է թողնում:

«Ինչ երաշխիքներ ունենք, որ վավերացնելով կոնվենցիան, կկարողանանք քրեական պատասխանատվության ենթարկել բոլոր հայկական դեղային մաֆիոզներին, որոնց անուն առ անուն բոլորս էլ հրաշալի գիտենք»,-ասաց Ն. Զոհրաբյանը:

ՕԵԿ պատգամավոր Հովհաննես Մարգարյանը խնդրի առնչությամբ նշեց, որ 100 մլրդ դոլարի դեղ է կեղծվում, որից անմասն չէ Հայաստանը. կեղծ դեղերը միլիոնավոր մարդկանց վնաս են պատճառում:

«Հայաստանում դեղերի որակից դժգոհում են ոչ միայն հիվանդները, ովքեր օգտագործում են այդ դեղերը, այլ նաև բժիշկները. վիրահատության ժամանակ քնաբեր են տալիս՝ չեն քնում»,- ասաց Հ. Մարգարյանը, հավելելով, որ սա ուղղակի դավաճանություն է, ամենածանր դավաճանությունը մեր ժողովրդի դեմ:

Պատգամավորը նաև նշեց, որ խոսում են օգտագործված և վատորակ ստենտների, ուռուցքային հիվանդությունների բուժման դեղերի ցածր որակի մասին. երբ այդ դեղերի համար տնից տուն ընկած փող են հավաքում, հիվանդի կյանքը կարճ է, իսկ դեղերը՝ անորակ:

«Հիմնական զեկուցող, ՀՀ առողջապահության փոխնախարար Սերգեյ Խաչատրյանը խնդրի առնչությամբ նշեց, որ հարցը վերաբերում է նախ քրեական ու քննչական համապատասխան մարմիններին», – այսօր համապատասխան քայլեր ձեռնարկվում են այս ուղղությամբ:

Նշենք, որ այսօր կառավարությունում բարձրացվել է դեղերի անհիմն թանկացման հարցը, նշվել է, որ թանկացել է «Նատալիֆարմ»-ի դեղերը: ընկերությունը պատկանում է Սամվել Ալեքսանյանին (Լֆիկ Սամոյին), նա նաև մանկական սնունդ է ներկրում Հայաստան: