Ասելիք չունե՞ք, պարո՛ն նախարար. Վաղարշակ Հարությունյանը կրկին փախուստի դիմեց (տեսանյութ)

Տարածաշրջանում պայթյունավտանգ իրավիճակ է, իսկ երկրի անվտանգությամբ զբաղվող ոլորտները, մեղմ ասած, էշի ականջում քնած են: Փոխարենը, հայ հասարակությունն ամեն օր իմանում է նոր տարածքի ու հայկական կողմի դիրքերի գրավվման մասին:

Պաշտպանության նախարար Վաղարշակ Հարությունյանը, որպես ՀՀ Զինված ուժերի ղեկավար, թեև այս հարցում հանդիսանում է թիվ մեկ պատասխանատուն ու կարող է պատասխանել հասարակությանը հուզող մի շարք հարցերի՝ կապված երկրի անվտանգության հետ, սակայն վերջին ժամանակներում նա անընդհատ խուսափում է լրագրողներից ու այդ թեմայի շուրջ նրանց տված հարցերից:

Հիշեցնենք այս տարվա փետրվարի սկզբին տեղի ունեցած միջադեպը, երբ նախարարը թաքնվեց իր «ախրանիկի» հետևում՝ թույլ տալով նրան վիրավորել իրեն հարցեր ուղղած լրագրողին:

Վաղարշակ Հարությունյանն ինչպես այդ անգամ, այս անգամ ևս հայտարարեց, թե հիմա այդ հարցերին պատասխանելու ժամանակը չէ: Դեռ այն ժամանակ էինք հարցադրում արել, թե երբ է գալու այդ գրողի տարած ժամանակը:

Ամեն անգամ, երբ նախարարն ու պատկան մարմինները խուսափում են երկրի սահմանազատման ու դրա հետ կապված խնդրիներից բխող մի շարք հարցերի  պատասխաններից, հաջորդ պահին հասարակությունը իմանում է թշնամիների կողմից իրականացված հակահայ գործողությունների մասին:

Այս պահին չքննարկելով մինչ այս տեղի ունեցածը (թեև դրանք ուշագրավ են և դեռևս դրանց վերաբերյալ սպառիչ մեկնաբանությունները չեն հնչել) Սյունիքում ամեն օր նոր խնդիր է ծագում: 

Դեռ 2 օր առաջ ադրբեջանցիները գողացել են Շուռնուխի բնակչի կովերն ու քշել դեպի ադրբեջանական տարածք... այս հարցին պատկան մարմիններն անհաղորդ մնացին այնպես, կարծես ամեն ինչ նորմալ է...

Չենք խոսում թուրքերի կողմից ամեն մի նոր դիրքի գրավվման ու թիզ-թիզ առաջ գալու մասին...

Հիշեցնենք նաև, որ նախօրեին ադրբեջանցիները փորել էին խրամատներ՝ Շուռնուխ-Կապան ճանապարհից 20-30 մետր հեռավորության վրա:

Ասելիք չունե՞ք, պարոն նախարար... դեռ ինչքա՞ն պետք է ժամանակ ձգեք, ի՞նչ դավեր են հյուսվում հայի դեմ, որի մասին չեք ուզում խոսել... դեռ որքա՞ն պետք է փախչեք պատասխաններից...