Մարդու իրավունքները պաշտպանված կլինեն, երբ ունենանք լեգիտիմ իշխանություն

Նախորդ տարիների համեմատ՝ Հայաստանում մարդու իրավունքների պաշտպանությունը հետընթաց է ապրել: Այդ մասին հայտարարում են իրավապաշտպանները՝ մատնանշելով հատկապես բողոքի ակցիաներն ու հանրաքվեն:

Անդրադառնալով մարդու իրավունքերի պաշտպանությանը «Իրավունքի գերակայություն» ՀԿ-ի անդամ Արտակ Զեյնալյանը մասնավորապես նկատեց, որ հանրաքվեի ժամանակ ոչ միայն վերակենդանացան մարդու իրավունքների մի շարք խախտումներ, այլև դրանց ավելացան նաև նոր տեսակներ:

«Հայաստանում մարդու իրավունքերը խախտված են, սակայն մեր հնարավորություններն ու արժանիքները թույլ են տալիս շատ ավելի լավ վիճակում գտնվել, քան այսօր է»,- newspress.am-ի հետ զրույցում ասաց Արտակ Զեյնալյանը:

Այն, որ մեր երկրում մարդու իրավուքները պաշտպանված չեն, արձանագրում են թե՛ մարդու իրավունքի դատարանը, թե՛ իրավապաշտպան միջազգային կառույցները, թե՛ քաղաքացիական հասարակության ինստիտուտի ներկայացուցիչները,թե՛ սահմանադրական դատարանը և թե՛ ընդհանուր իրավասության դատարանը:

Արտակ Զեյնալյանի խոսքով՝ այդ խախտումներն առավել շատ արձանագրում են քաղաքացիական նախաձեռնության ներկայացուցիչները և միջազգային կազմակերպությունների համապատասխան խմբերը, որոնք օժտված են այդ լիազորություններով:

«Դրանք արձանագրվում են համատարած: Մասնավորապես վերջին հանրաքվեի ժամանակ տեղի ունեցան մարդու իրավունքերի մասսայական խախտումներ, որոնք պտտվում էին ընտրական իրավուքնի խախտման շուրջը: Դրանք արձանագրված են և բավականին շատ են»,- ասաց Արտակ Զեյնալյանը:

Նրա խոսքով մարդու իրավունքերը պաշտպանված կլինեն, երբ ունենանք անկախ դատական համակարգ և լեգիտիմ քաղաքական իշխանության:

Հիշեցնենք, որ այսօր մարդու իրավունքների պաշտպանության միջազգային օրն է: