Պոզների հետ կապված միջադեպից հետո Կրեմլը ռուսների այցը Վրաստան վտանգավոր է անվանել

Ռուսները պետք է հստակ հասկանան, որ Վրաստան մեկնելը նրանց համար անվտանգ չէ: Այս հայտարարությունն արել է Ռուսաստանի Դաշնության նախագահի մամուլի քարտուղար Դմիտրի Պեսկովը՝ Թբիլիսիում հեռուստահաղորդավար Վլադիմիր Պոզների հետ մեկ օր առաջ տեղի ունեցած միջադեպից հետո: Այս մասին գրում է Tass-ը։

Չորեքշաբթի երեկոյան տասնյակ ցուցարարներ հավաքվել էին Վրաստանի մայրաքաղաքի կենտրոնում գտնվող հյուրանոցներից մեկի մոտ, որտեղ հանգրվանել էր Պոզները: Տեղի են ունեցել բախումներ ոստիկանության հետ:

Մարդկանց դժգոհության պատճառը  Աբխազիայի և Հարավային Օսիայի մասին ռուս լրագրողի ավելի վաղ արած հայտարարություններն էին: Նա ասել է, որ եկել է Վրաստան՝ իր ծննդյան օրը նշելու, այլ ոչ թե քաղաքականությունից խոսելու համար:

«Վրաստանը Ռուսաստանի քաղաքացիների համար վտանգավոր է։ Այնտեղ ուղղակի վտանգավոր է մեկնել։ Ռուսները պետք է սա հստակ հասկանան»,-ընդգծել է Կրեմլի խոսնակը՝ մեկնաբանելով միջադեպը:

Պեսկովը հավելել է, որ Մոսկվան խստորեն դատապարտում է ծայրահեղ ազգայնականների ագրեսիվ գործողությունները Թբիլիսիում Ռուսաստանի քաղաքացիների դեմ:

«Մենք տեսանք Վրաստանի վարչապետի այսօրվա հայտարարությունը, որը նույնպես դատապարտեց այդ գործողությունները, և մենք ողջունում ենք այս հայտարարությունը», - ասել է ՌԴ ղեկավարի խոսնակը:

Կրեմլի խոսնակը նշել է, որ Մոսկվան երախտապարտ է նաև վրացական ոստիկանությանը՝ ռուսների անվտանգությունն ապահովելու համար:

«Եվ վերջում, իհարկե, մենք շնորհավորում ենք Պոզներին ծննդյան օրվա առթիվ: Ավելի լավ է այն դիմավորել տանը: Այստեղ ավելի հանգիստ է», - ամփոփել է Պեսկովը: