Վթարի միտում չպարունակող խախտումների համար նախատեսվում է տուգանք չսահմանել

Կառավարությունն այսօր հավանություն տվեց երթևեկությանը վերաբերող մի շարք օրենքներում փոփոխություններ կատարելու մասին օրենքի փաթեթին, որոնք վերաբերում են տեսանկարահանող սարքերի կողմից արձանագրվող խախտումներին:

«Առաջին՝ առաջարկում ենք մի շարք խախտումների համար, օրինակ՝ խաչմերուկների հատման կանոնները խախտելը, գծանշումների պահանջները խախտելը և օրենքում նշված ևս մեկ տասնյակից ավելի խախտումների դեպքում հնարավորություն ընձեռել, եթե դրանք միտում չեն պարունակել, վթարային իրավիճակ չեն ստեղծել, դիտավորություն չեն ունեցել, չկիրառել տուգանք, այլ կիրառել նախազգուշացում»,-ասաց արդարադատության նախարար Արփինե Հովհաննիսյանը:

Յուրաքանչյուր քաղաքացի հնարավորություն կունենան տեսնել, թե ամսվա ընթացքում քանի խախտում է արել, բայց դրանց համար ծանուցմամբ այլևս նախազգուշացում չի լինի:

Երկրորդ փոփոխությունը վերաբերում է դեպքերին, երբ իրավախախտը կվերացնի խախտումը տեղում, ինչը հնարավորություն կտա չտուգանվել:

«Բարդացրել ենք կեղծված համարանիշերով մեքենաներ վարելու համար նախատեսված պատասխանատվությունը, պահանջի կրկնակի խախտումից հետո նախատեսվում է զրկել վարորդական իրավունքից։ Երկրորդ՝ օտարերկրացի վարորդները սահմանին կտեղեկացվեն, որ եթե մեկ տարվա ընթացքում չվճարեն վարչական տուգանքները, ապա մեկ տարով չեն կարողանա հատել սահմանը»,-ասաց նա:

Խստացվում է սահմանված պատիժը նաև ալկոհոլ ընդունած վարորդների համար:

«Ողբերգական ավարտ ունեցող վթարների վիճակագրությունը ցույց է տալիս, որ մեծամասամբ վարորդները լինում են ոչ սթափ վիճակում: Բարձրացնում ենք պատասխանատվությունը, ընդհուպ մինչև քրեական պատասխանատվություն, կրկնակի վարչական տուգանքից հետո մեկ տարվա ընթացքում կրկնվելու դեպքում»,-ասաց նա:

Հավելենք, որ փոփոխություն է նախատեսվում նաև տաքսիների վարորդների համար: Նրանք օրենքի փոփոխության դեպքում կկարողանան ուղևորներ իջեցնել կամ վերցնել կայանելու համար չնախատեսված վայրերում, սակայն ընդամենը մեկ րոպեում: