Ազատության հրապարակի երթն առանց բախումների չանցավ (տեսանյութ)

Ազատության հրապարակից մեկնարկած երթի մասնակիցները «Ամոթ», «Անվավեր» վանկարկելով քիչ առաջ հասան Կենտրոնական ընտրական հանձնաժողովի շենքի մոտ, որտեղ շենքից որոշ չափով հեռու արդեն դիրքավորվել էին ոստիկանները:

ԱԺ «Հայ ազգային կոնգրես» խմբակցության ղեկավար Լևոն Զուրաբյանը բանակցեց Երևանի փոխոստիկանապետ Վալերի Օսիպյանի հետ, որպեսզի ոստիկանները թույլատրեն երթի մասնակիցներին մոտենալ ԿԸՀ շենքին:

Վալերի Օսիպյանը նշեց, որ եթե Լևոն Զուրաբյանը երաշխավորում է, որ շենքին որևէ մեկը որևէ բան չի անի, քանի որ մտահոգված են, որ կլինեն սադրիչներ, թույլ կտան մոտենալ շենքին, իսկ Լևոն Զուրաբյանն առաջարկեց շենքի դիմաց ոստիկանները պատ կազմեն: Այսպիսով` նրանք եկան համաձայնության և երթի մասնակիցները այս պահին շենքի մոտ են ու իրենց վրդովմունքն են հայտնում:

Հիշեցնենք, որ ՀԱԿ-ը, «Նոր Հայաստանը» այսօր՝ մարդու իրավունքների պաշտպանության միջազգային օրը, կազմակերպել էին համատեղ երթ՝ Ազատության հրապարակից, դեպի Կենտրոնական ընտրական հանձնաժողով:

Մանրամասները` տեսանյութում