Ո՞ւր է Հովիկ Աբրահամյանը. գործարք Փաշինյանի հե՞տ, թե՞ հասարակ շանտաժ

«Հարցի այս կողմում մարդ է, որ սխալական է, և հասկացել է իր սխալը։ Բայց ինչ ասես, երբ հարցի մյուս կողմում պետությունն է, որն իրեն պահում է ոգևորված չար մանկան պես»։ Խոսքերի հեղինակը ՀՀ նախկին վարչապետ Հովիկ Աբրահամյանն է, ով խոսում էր այն ժամանակ նոր իշխանությունների՝ իրեն, այսպես ասենք, հետապնդելուց:

Նախկին վարչապետն այսօր տարօրինակ կերպով բերանը ջուր է առել ու լեզուն կուլ տվել, երբ հազարավոր մատաղ կյանքեր են կորսվել, սերունդ է կործանցվել, հայրենիք է նվիրաբերվել թշնամի թուրքին, այս պահին էլ մեծ դավադրություն է նախապատրաստվում՝ ճանապարհները բացելու անվան տակ սքողելով Թուրքիայի կողմից Հայաստան պետության անարյուն զավթումը:

Պաշտոնաթող վարչապետը, նախկինում ասենք, բանակի մասին գրում էր. «Բանակի կազմավորումը, կայացումը հայ ժողովրդի ազատատենչության, հզոր հայրենիք ու պետություն ունենալու վառ դրսևորման արգասիքն է: Հայրենանվիրում մեզ ոչ ոք չի սովորեցրել. դա մեր նկարագիրն է, էությունը»: 

Այժմ, երբ մեզ հայրենազրկում են, բանակը բացահայտորեն գլխատում ու քանդում, սույն նախկին պաշտոնյան, որի անվան հետ բազմաթիվ ապօրինություններ էին կապվում, այժմ հանգիստ հետևում է սարսափի այս տեսարանին: Այսպե՞ս է Աբրահամյանի հայրենանվիրման նկարագիրն ու էությունը: 

Երբ նոր իշխանության իրավապահները դեռևս 2018-ին առգրավում էին Աբրահամյանի անձնագիրը, նա իսկական վայնասուն էր բարձրացրել, խոսում էր օրենսդրությունից և այլնից: Հետո ինչ-որ հրաշքով մաքրվեց նրա անունը: Այս օրերին և ընդհանրապես, վերջին տարում, երբ աջուձախ բռնաբարվում է ՀՀ օրենսդրությունը, Սահմանադրությունն ինքնին, նախկին ռեժիմի ներկայացուցչի ծպտունն անգամ չկա: Եվ դա այն դեպքում, երբ նախկին իշխանությունների նույնիսկ ամենապախարակված ու ամենահեշտ թիրախավորվող պաշտոնյաներն այս օրերին փողոցում էին՝ հանուն հայրենիքի ու չվախենալով հետապնդվելուց ու կալանավորվելուց: 

Ուրեմն Աբրահամյանի համար ոչ միայն ընդունելի է այն արհավիրքը, որ բերեցին Հայաստանի գլխին, այլև նա կա՛մ ստախոս է, կա՛մ վախկոտ:

Նույն կերպ, դեռևս 2018-ի սեպտեմբերի 2-ին Արցախի անկախության հռչակման միջոցառմանը մասնակցող Աբրահամյանն ընդհանրապես չի սգում Արցախի 3/4-ի կորուստը:

Սերժ Սարգսյանից հեռացած-չորացած «առվակը» տաքուկ բարեկամություն է անում արդեն Նիկոլի հետ: Չնայած, մամուլում տեղեկություններ տարածվեցին այն մասին, որ Աբրահամյանը կոմպրոմատ՝ տեսանյութ Փաշինյանի մասնակցությամբ, որում երևում է, թե ինչպես է Աբրահամյանը գումար փոխանցում վերջինիս: Չենք բացառում, որ Փաշինյան-Աբրահամյան պայմանավորվածությունն ընդամենը շանտաժ է՝ լռություն ազատության դիմաց սկզբունքով: Բայց հաշվի առնելով, որ Աբրահամյանի եղբոր գործերն իրավական դաշտում «այնքան էլ լավ չեն», հնարավոր է, որ Արցախի կորստի ու բանակի գլխատման համար Աբրահամյանը գործարքի է գնացել Փաշինյանի հետ՝ լռությամբ գնելով եղբոր ազատությունը: 

Ի դեպ, նկատենք, որ տարօրինակ լռություն է պահպանում նաև Աբրահամյանի՝ նախկին քաղաքապետ, նախկին պատգամավոր որդին՝ Արգամ Աբրահամյանը: Ինչպես ավագ Աբրահամյանին, այնպես էլ կրտսերին միայն սեփական կաշին է հետաքրքրում: Կարևորը՝ հայրիկը սեփական ազատությունն ու դղյակները ապահովագրող տեսանյութ ունի... 

NEWSPRESS.am