Դատարանը հենց այսօր պետք է հրատապ նիստ հրավիրի ու քրեական հետապնդումը դադարեցնի. Հայկ Ալումյան

«Քրեական օրենսգրքի 300.1 հոդվածի վերաբերյալ ՍԴ տված գնահատականներն ամբողջությամբ համապատասխանում են մեր գնահատականներին, որոնք մենք տվել ենք դեռ 2018 թավականին»: Այդ մասին հայտարարեց ՀՀ երկրորդ նախագահ Ռոբերտ Քոչարյանի փաստաբանական թիմի անդամ Հայկ Ալումյանը։

Նա հույս ունի՝ որևիցե մեկի մտքով չի անցնի կասկածի տակ դնել Սահմանադրական դատարանի որոշումը։

«Բոլոր նրանց համար, ովքեր այս գործի հետ կապ ունեն, պարզ դարձավ այն, ինչ սկզբից էլ պարզ էր։ Հիմա հույս ունեմ, որևէ մեկի մտքով չի անցնի կասկածի տակ դնել այն, ինչ մենք երկուս ու կես տարի ասում ենք»,- ասաց Ալումյանը։

Փաստաբանի խոսքով, ինքը կարող է ասել, թե իրավաբանական առումով ինչ պետք է հաջորդի ՍԴ որոշմանը, բայց ասել, թե ի՞նչ է սպասվում, չի կարող։

«Օրենքով դատարանը ոչ թե վաղը, այլ հենց այսօր պետք է հրատապ նիստ հրավիրի ու հենց այսօր պետք է քրեական հետապնդումը դադարեցնի և պարոն Քոչարյանի, և մյուս երեք մեղադրյալի նկատմամբ, ու 300.1 հոդվածով քրեական գործով վարույթը պետք է կարճվի», - ասաց նա։

Ալումյանի խոսքով՝ համապատասխան միջնորդություններն արդեն ներկայացված են, թեև, եթե միջնորդություններն էլ չներկայացվեին, դատարանը պետք է դա անի։

«Մեղադրող կողմն էլ պետք է հրաժարվի մեղադրանքից», - ասաց Քոչարյանի փաստաբանը։

Ալումյանն ընդգծեց, որ օրենքի համաձայն, քրեական հետապնդում իրականացնող մարմինը պարտավոր է գրավոր հայցել ներողություն այն անձից, ում նկատմամբ հետապնդում իրականացվել է։

Փաստաբանն ասաց՝ ներկայացրել են նաև միջնորդություն խափանման միջոցը վերացնելու համար։

«Եթե այնուամենայնիվ դատարանը գտնի, որ խափանման միջոց պետք է լինի, քանի որ կա մեկ այլ մեղադրանք, ապա գրավի չափը պետք է զգալիորեն նվազի։ Չնայած խափանման միջոցի հիմքեր չկան»,- նշեց նա։

Ինչ վերաբերում է Ռոբերտ Քոչարյանի նկատմամբ մյուս մեղադրանքին, ապա Ալումյանի կարծիքով, ըստ երևույթին քննարկումներ են եղել, նաև զեկուցվել է, որ 300.1 հոդվածով գործը ջուր է, ինչի մասին մի անգամ հայտարարել է անձամբ Փաշինյանը։

«Մտածել են, ո՞նց անեն, որ Ռոերտ Քոչարյանը չհայտնվի ազատության մեջ, չարդարացվի, երևի տրադիցիոն ոճը ունեցող որոշ մարդիկ ասել են, ի՞նչ է եղել, բերեք կողքից մի հատ էլ մեղադրանք դնենք, թե մեկով արդարացվի, մյուսով մեղավոր կճանաչվի։ Սա գրպանը թմրամիջոց գցող իրավապահների ոճ է։ Հենց այդ ոճի մեջ դրել են մեղադրքն, որը տրամաբանության մեջ էլ չի տեղավորվում, նյութերն այլ բան են ասում, մեղադրանքի մեջ ուրիշ բան է գրված։ Կաշառքի մեղադրանքն այնքան թույլ էր, որ նույնիսկ դատարանները կալանքի ժամանակ գրում էին, որ չկա հիմնավոր կասկած, կաշառքով հիմնավոր կասկածը բացակայում է»,-մանրամասնեց Ալումյանը։

Հիշեցնենք, որ ՍԴ որոշման համաձայն 300.1 հոդվածը հակասում է Սահմանդրության 78 և 79 հոդվածներին։ ՍԴ որոշումն այսօր մտնում է ուժի մեջ։