Կարծեք պինգ-պոնգի խաղ լինի. Ռոբերտ Քոչարյանի փաստաբանը դատական գործընթացը թատրոն է որակում

ՀՀ երկրորդ նախագահ Ռոբերտ Քոչարյանի՝ Ֆրանսիայում աշխատող փաստաբան Սևակ Թորոսյանը  համոզված է, միջազգային բոլոր կառույցները հերթով վատ կարծիք են հրապարակելու Հայաստանի ներկայիս իշխանությունների մասին, քանի որ միջազգային կազմակերպությունները ստանում են ազդակներ, որ Հայաստանը իրավական պետության հետ կապ չունի։ Փաստաբանը լրագրողների հետ հանդիպմանը նկատեց, որ միջազգային կառույցները հիմա հստակ հասկանում են այդ խախտումներն ու արձագանքում դրանց, ինչպես օրինակ Ինտերպոլը, որը «արդար որոշում» կայացրեց նախկին գլխավոր դատախազ Գևորգ Կոստանյանի վերաբերյալ։

«Այն, ինչ տեսել եմ վերջին երկու-երեք տարիների ընթացքում. հեռատես ռազմավարություն չկա ոչ մի ոլորտում, այդ թվում քրեական, իրավական հարցերում։ Նրանք գործում են այսպես, այսօր դիմենք Ինտերպոլ, վաղը կտեսնենք։ Այդպես է եղել նաև Ռոբերտ Քոչարյանի դատավարության ընթացքում»,-ասաց նա։

Սևակ Թորոսյանը հիշեցնում է, որ Ռոբերտ Քոչարյանի նկատմամբ հարուցված քրեական գործի դատավարությանը հրաժարվում է մասնակցել, քանի որ տեղի ունեցող գործընթացը թատրոն է համարում։

«Այն, ինչ տեղի է ունենում ամեն շաբաթ, կարծեք պինգ-պոնգի խաղ լինի։ Անշուշտ մինչև վերջ ես շարունակելու եմ պաշտպանել երկրորդ նախագահին»,-նշեց նա։

Սևան Թորոսյանը պնդում է, որ այժմ Հայաստանում բռնապետություն է ստեղծված։

«Գիտեք, իմ ընկերները ֆեյսբուքում գրառում են կատարել, ոստիկանություն են կանչվել։ Սա ծիծաղելի բան է։ Հիմա է ծիծաղելի։ Մինչև որ հիվանդ մեկը ջղայնանա, որ ծիծաղում ենք ու սկսի Պաղեստինի նախագահի պես ավելի հեռուն գնալ՝ օրինակ մարդասպանության։ Գիտե՞ք, հոգեկան հիվանդությունները սահմաններ չունեն, մանավանդ երբ դու իշխանություն ունես»,-ասաց փաստաբանը։