«Եթե ունենանք նորմալ, ադեկվատ բանակցողներ, ովքեր մտահոգ են մեր երկրի ճակատագրով՝ կունենանք ինչ-որ հաջողություն»․ Առուշ Առուշանյան

Գորիս համայնքի ղեկավար Առուշ Առուշանյանը վստահեցնում է՝ չկա այն մարդը, ով կբանակցի ու կփաստի, որ օրինակ Շուռնուխը, Որոտանը ու Ներքին Խնձորեսկից տարածքներ հայկական են, մերն են։

Նա լրագրողների հետ հանդիպանը նկատեց, որ այդ իրավիճակից էլ հենց օգտվում է թշնամին ու իր GPS-ով է սահման գծում։

«Եթե ունենանք նորմալ, ադեկվատ մարդիկ, ովքեր մտահոգ են մեր երկրով, բնականաբար, այդ խնդիրներն այլ հարթակներում բարձրացնելով՝ մենք կհասնենք ինչ-որ հաջողության»,- ասաց Առուշ Առուշանյանը։

Նա չի երաշխավորում, որ այս պահին սահմանազատումներն ավարտված են։ Համայնքապետի խոսքով, այսօր էլ դեռ թշնամու և հայ սահմանապահների միջև բանակցություններ են ընթանում որոշակի տարածքների հետ կապված։

«Ընթացիկ խնդիրներ լինում են թշնամու հետ՝ այս հատվածն իրենցն է կամ մերն է։ Գործող «իշխանությունն» առհասարակ հստակություն չի մտցրել, թե ինչ է կատարվում: Թե պատերազմի ընթացքում, թե պատերազմից հետո, թե մինչև օրս, որևէ գործողության մեջ հստակություն չկա»,- ասաց Առուշանյանը։

Նա նաև հաստատեց այն լուրերը, որ թշնամին Ներքին Խնձորեսկում մի քանի մետր էլ է առաջ եկել։

«Այո, այդպիսի փաստ կար. էլի GPS-ով ցույց էր տալիս, որ դա իրենց հատվածն է, նրանք էլ նորից առաջ են եկել»:

Ինչ վերաբերվում է Շուռնուխում իրենց կորցրած գյուղացիների համար կառավարության կողմից կառուցվելիք տներին, ապա Առուշանյանն այն կեղծիք որակեց։ Պարզվում է՝ նման բան չկա։

«Կեղծիք է, միֆ՝  չկա նման բան»,-ասաց Առուշանյանը՝ վստահեցնելով, որ կառավարությունը դեռ նոր դիմել է համայանքապետարան, որպեսզի հողի կատեգորիան փոխվի, որ տուն կառուցեն։

«Ինչ գործողություն, որ կատարվում է Շուռնուխում, մի մասը ֆինանսավորում է Զանգեզուրի պղնձամոլիբդենային կոմբինատը, մի մասը այլ բարեգործներ։ Այս պահին մոտ 30 տուն է կառուցվում Շուռնուխում, նաև մեր Արցախի հայության համար, ովքեր տուն չունեն, իրենց էլ է տուն տրամադրվելու»,- ասաց նա։